वास्तविक कार्यकर्ता शिबिराच्या उद्घाटनप्रसंगी छगन भुजबळ किंवा धनंजय मुंडे हे दोघेही उपस्थित नव्हते. त्यामुळे संमेलनाच्या दुसऱ्या आणि शेवटच्या दिवशी दोन्ही नेते शिर्डीत येतात की नाही याकडे सर्वांचे लक्ष लागले होते. मात्र हे दोघेही रविवारी कार्यकर्ता शिबिरासाठी उपस्थिती लावली होती.

भुजबळ कार्यकर्त्यांना संबोधित करताना म्हणाले की, काल प्रफुल्ल पटेल माझ्याकडे आले होते. दोन-तीन तास आम्ही चर्चा केली. कार्यकर्ता शिबिराला यावे, अशी विनंती त्यांनी केली होती. तेवढ्यात मला सुनील तटकरे यांचा फोन आला की, कृपया शिबिराला या. म्हणूनच थोडा वेळ काढून मी येथे आलो. या बहाण्याने साईबाबांचेही दर्शन घेतले होते. अजित पवार यांच्यावरील नाराजीच्या मुद्द्यावर भुजबळ म्हणाले की, ही पक्षाचे कार्यकर्ता शिबिर आहे, कोणा एका व्यक्तीचे नाही.

दरम्यान बीडमधील मस्साजोग गावचे सरपंच संतोष देशमुख हत्येप्रकरणी करण्यात आलेल्या गंभीर आरोपांना तोंड देत धनंजय मुंडे यांनी प्रथमच पक्षाच्या व्यासपीठावरुन स्पष्टीकरण दिले आहे. ‘मला जाणीवपूर्वक टार्गेट केले जात आहे, पण मी अभिमन्यू नाही, मी अर्जुन आहे,’ असे मुंडे म्हणाले. तर बीड म्हणजे बिहार आणि परळी म्हणजे तालिबान अशी भयंकर खोटी प्रतिमा निर्माण केली जात आहे. संतोष देशमुख यांच्या मारेकऱ्यांना फाशी व्हायलाच हवी, अशी मागणीही धनंजय मुंडेंनी केली आहे.

तर अध्यक्ष अजित पवार यांनी मुंडे यांच्या भाषणाचे सर्वांसमक्ष कौतुक केले. गेल्या काही दिवसांपासून निर्माण होत असलेले वादळ शांत करण्याचे काम धनंजय मुंडे यांनी केले आहे, असे पवार म्हणाले. तसेच आगामी स्थानिक स्वराज्य संस्थांच्या निवडणुका डोळ्यासमोर ठेवून अजित पवार यांनी कार्यकर्त्यांना कामात जुंपून घेण्याचे सांगत पक्षाला नव्या उंचीवर नेण्याचे आवाहन देखील केले आहे.