Pimpri-Chinchwad Knife Piece Found In Pizza: पिंपरी-चिंचवडमध्ये डॉमिनोज पिझ्झामध्ये चाकूचा तुटलेला तुकडा आढळून आल्याने एकच खळबळ माजली आहे. एक व्यक्ती आपल्या कुटुंबासह पिझ्झाचा आस्वाद घेत असताना त्याच्या दातात हा चाकूचा तुकडा अडकला.
कापसे यांच्यासोबत नेमकं काय घडलं?
पिंपरी-चिंचवड भोसरी येथील इंद्रायणी नगरमध्ये राहणाऱ्या अरुण कापसे या व्यक्तीने आपल्या कुटुंबीयांसाठी शुक्रवारी रात्री जय गणेश साम्राज्य चौकातील डॉमिनोज पिझ्झा स्टोअर मधून ५९६ रुपये किमतीचा एक पिझ्झा ऑनलाइन ऑर्डर केला होता. पिझ्झा आल्यानंतर ते आपल्या कुटुंबीयांसोबत पिझ्झाचा आस्वाद घेत असताना, अरुण कापसे यांच्या दातात अक्षरशः पिझ्झा कट करणाऱ्या चाकूच्या तुटलेला तुकडा घुसला आणि कुटुंबीय खूप घाबरले. काही क्षण त्यांना कळालंच नाही की काय घडलं. जेव्हा त्यांनी पाहिलं तेव्हा त्यांना कळालं की आपल्या दातात चाकूचा तुकडा घुसला आहे तेव्हा त्यांना धक्काच बसला.
अरुण कापसे यांनी आपल्यासोबत घडलेला प्रकार अतिशय धक्कादायक असल्याने त्यांनी लगेच डॉमिनोज पिझ्झाच्या मॅनेजरला फोन करून घडलेला सर्व प्रकार सांगितला. मात्र, सुरुवातीला त्यांना डॉमिनोज पिझ्झाच्या मॅनेजरकडून उडवा उडवीची उत्तर देण्यात आली. मात्र, मॅनेजरने घरी येऊन पिझातील तुटलेला चाकूचा तुकडा बघितल्यानंतर त्याला देखील आश्चर्याचा धक्का बसला.
या सर्व प्रकारानंतर डॉमिनोज पिझ्झाकडून अरुण कापसे यांना त्यांच्या पिझ्झाच्या ऑर्डरचे पैसे लगेच परत करण्यात आले आहेत. मात्र, नागरिकांच्या आरोग्याशी, खेळ खेळणाऱ्या डॉमिनोज पिझ्झाविरोधात अरुण कापसे हे आज पुणे जिल्हा अन्न व औषध विभाग प्रशासनाकडे तक्रार करणार आहेत.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा