कार्यक्रमादरम्यान सुदैवाने कोणालाही दुखापत झालेली नाही

सुदैवाने या कार्यक्रमात कोणालाही दुखापत झाली नसून धीरेंद्र शास्त्री महाराज यांच्याकडून विभूती घेण्यासाठी त्यांच्या अनुयायांनी एकच गर्दी केल्याने हा प्रकार घडला. दरम्यान, या गोंधळानंतर धीरेंद्र शास्त्री यांनी सत्संग कार्यक्रम अर्ध्यावर सोडला. या घटनेमुळे धार्मिक कार्यक्रमात होणाऱ्या गोंधळाचा प्रश्न पुन्हा एकदा ऐरणीवर आला आहे.

बागेश्वर बाबाच्या कार्यक्रमात नेमकं काय घडलं?

भिवंडीतील एका गोदाम संकुलात धीरेंद्र शास्त्री महाराज यांचा सत्संग सोहळा कार्यक्रम आयोजित केला होता. यावेळी त्यांच्या अनुयायांनी मोठ्या प्रमाणात गर्दी केली होती. या कार्यक्रमादरम्यान धीरेंद्र शास्त्री महाराज यांनी अनुयानांना विभूती घेण्यासाठी सर्वप्रथम महिलांना, त्यानंतर पुरुषांना रांगेत येण्याचे आवाहन केले होते. ही विभूती घेण्यासाठी सर्वांनी एकच गर्दी केली. त्यामुळे प्रचंड गोंधळ उडाला. यावेळी व्यासपीठावर जाण्यासाठी गर्दी केल्याने तिथे चेंगराचेंगरी झाली. या गोंधळात व्यासपीठावर जिन्याची रेलिंगही तुटली. त्यामुळे काही महिला खाली पडल्या.

परिस्थिती हाताबाहेर जाताच सुरक्षारक्षक आणि पोलिसांनी हस्तक्षेप करत परिस्थिती नियंत्रणात आणली

पुरुषांची धक्काबुक्की झाल्याने परिस्थिती हाताबाहेर जाताच सुरक्षारक्षक व पोलिसांनी यामध्ये हस्तक्षेप केला. तसेच, गर्दी पांगवण्यासाठी पोलिसांनी सौम्य बळाचा वापरही केल्याची माहिती आहे. या गोंधळानंतर धीरेंद्र शास्त्री महाराज यांनी व्यासपीठ सोडले. पोलिसांनी गर्दीत खाली कोसळलेल्या अनुयानांना उचलून बसवले, त्यांना पाणी पाजले. घटनेत कोणाला दुखापत न झाल्याचे सहाय्यक पोलीस आयुक्त सचिन सांगळे यांनी सांगितलं आहे.