संतोष देशमुख यांची हत्या व सोमनाथ सूर्यवंशी यांच्या संशयास्पद मृत्यूच्या निषेधार्थ सिंदखेड राजा येथे सोमवारी राजमाता जिजाऊ यांचे जन्मस्थळ असलेल्या राजवाड्यापासून तहसील कार्यालयापर्यंत विराट मोर्चा काढण्यात आला. या मोर्चामध्ये संतोष देशमुख यांची मुलगी वैभवी, मुलगा विराज आणि बहिणीसह मस्साजोगमधील नातेवाइक व नागरिक सहभागी झाले होते. देशमुख यांची हत्या करणाऱ्या आरोपींना तत्काळ अटक करून कठोर कारवाई करण्यात यावी, हा खटला फास्टट्रॅक कोर्टात चालविण्यात यावा, या मागण्या याप्रसंगी करण्यात आल्या. यावेळी बोलताना वैभवीला अश्रू अनावर झाले.

रडू कोसळतच ती म्हणाली, राजमाता जिजाऊ यांनी छत्रपती शिवाजी महाराजांना घडविले, संस्कार दिले. ते आपण जपत आलो आहोत. जिजाऊंपासून स्फूर्ती घेण्यासाठीच आज मी इथे आले आहे. मुख्यमंत्र्यांकडे जिजाऊ जन्मस्थळावरून माझी विनंती आहे की माझ्या वडिलांच्या मारेकऱ्यांना तत्काळ पकडून कठोरात कठोर शिक्षा करावी. माझ्या वडिलांची क्रूर हत्या करण्यात आली. या घटनेच्या आधी ज्या घटना झाल्या त्या सगळ्यांना न्याय मिळाला पाहिजे. जे परिस्थितीमुळे लढू शकले नाही, त्यांना न्याय मिळायला हवा. जेव्हा जेव्हा न्यायासाठी मोर्चे निघतात त्यामध्ये आपण सर्वांनी मोठ्या संख्येने सहभागी व्हावे, असे आवाहनही वैभवीने केले.

मोर्चात माजी आमदार राजेंद्र शिंगणे, शशिकांत खेडेकर, ॲड. संदीप मेहेत्रे, ज्योती जाधव, बाबुराव मोरे, राजेंद्र आढाव, शिवाजी राजे जाधव यांच्यासह हजारोंचा जनसमुदाय सहभागी झाला होता.

‘तुमची साथ कायम हवी’

तुमच्या सर्वांची साथ केवळ न्याय मिळेपर्यंत नाही तर आमच्या पुढच्या वाटचालीसाठीही कायमस्वरूपी राहू द्या, अशी विनंती देखील वैभवीने केली. सिंदखेड राजात आगमन झाल्यानंतर वैभवी, विराज, त्यांची आत्या आणि अन्य नातलगांनी जिजाऊंचे दर्शन घेतले.