खडकाळ भागावरुन पाय घसरला आणि जीवाला मुकला

वर्षाच्या अखेरीस अनेकजण सुट्ट्यांचा आनंद घेण्यासाठी बाहेर फिरण्यासाठी निघतात. समुद्रकिनारे, गड-किल्ल्यावर नागरिक फिरण्यासाठी येतात. जुन्नर तालुक्यातील नाणेघाट परिसरामध्ये असणाऱ्या किल्ले जीवधन इथेही अनेक पर्यटक पर्यटनासाठी येत असतात. शनिवारी सायंकाळच्या सुमारास विकी राठोड हा आपल्या मित्रांसोबत किल्ले जीवधन येथे पर्यटनासाठी आला होता. किल्ल्यावर असणाऱ्या कल्याण दरवाजा जवळील खडकाळ भागावरून विकीचा पाय घसरला. त्यामुळे तो खाली असलेल्या दगडांच्या ढिगार्‍यावर पडला. तो उंचावरुन जोरात पडल्याने त्याच्या डोक्याला गंभीर मार लागला आणि त्याचा जागेवरच मृत्यू झाला.
Fact Check : वाघाला पकडून हत्तीवरुन परेड काढल्याचा व्हिडिओ व्हायरल, जाणून घ्या सत्य

रेस्क्यू टीम तातडीने घटनास्थळी दाखल

घटनेची माहिती मिळताच शिवनेरी रेस्क्यू टीमचे सदस्य राजकुमार चव्हाण, मगदूम अली सय्यद, अनिकेत करवंदे तसेच वनविभागाचे कर्मचारी आणि स्थानिक ग्रामस्थांनी मृतदेह किल्ल्यावरून खाली आणला. विकी राठोड हा पिंपरी येथे राहत असून तळेगाव येथे अभियांत्रिकीचं शिक्षण घेत होता. किल्ले जीवधनवर मागील वर्षी देखील अशीच एका घटना घडली होती.

पर्यटकांनी फिरायाला येताना काळजीपूर्वक यावे, कुठलाही धोका पत्करून आपला जीव धोक्यात घालू नये, जीव धोक्यात घालून सेल्फी काढू नये, अन्यथा आपला जीव गमावावा लागू शकतो. अनेक तरुन तरुणीचे ग्रुप किल्ल्यावर फिरण्यासाठी येत असतात. त्यामुळे किल्ल्यावर आल्यावर हुल्लडबाजी करू नये असं आवाहन करण्यात आलं आहे.