गेले काही दिवस कडक्याची थंडी असताना अवकाळी पावसालाही अनुकूल वातावरण तयार झाले. बंगालच्या उपसागरात कमी दाबाचा पट्टा तयार झाल्याने व वातावरणीय बदलांमुळे ऐन हिवाळ्यात बेमोसमी पावसाने हजेरी लावली. येवला शहरासह तालुक्यात गेल्या तीन दिवसांपासून ढगाळ वातावरण होते. शुक्रवारी रात्री वातावरणात अचानक बदल झाला. मध्यरात्री सुरू झालेल्या अवकाळी पावसाने सुमारे अर्धा ते एक तासावरून अधिक काळ जोरदार हजेरी लावली.
राष्ट्रवादीचे ‘चलो दिल्ली’; विधानसभा निवडणुकीसाठी ११ उमेदवारांची यादी जाहीर
उन्हाळी कांद्याच्या रोपांना व रब्बी पिकांना मोठा फटका बसला आहे. खरीप कांदा, कांदे रोप, मका, गहू या पिकांचे मोठे नुकसान झाले आहे. शेतकऱ्यांनी काढून ठेवलेला कांदा ओला झाला तर काढणीला आलेला कांदा जमिनीतच सडण्याची शक्यता निर्माण झाली आहे. काढून ठेवलेला मकाही पावसाने ओला झाल्याने मोठे आर्थिक नुकसान होणार आहे. तालुक्यात काही ठिकाणी तर या पावसाने गहू आडवा झाला आहे. दरम्यान, झालेल्या नुकसानीचे पंचनामे करून शेतकऱ्यांना तातडीने नुकसान भरपाईची मागणी केली जात आहे.

निफाड तालुक्यात शिडकावा
निफाड : निफाड तालुक्यात शनिवारी काही भागात पाऊस झाला. पिंपळगाव, ओझर, निफाड याठिकाणी साधारणपणे १५ ते ३० मिनिटे पाऊस झाला. हलक्या स्वरूपाचा पाऊस असल्याने जास्त नुकसान झाले नसल्याची माहिती आहे. शनिवारी रात्री आठ वाजेच्या सुमारास पिंपळगाव, ओझर, आहेरगाव, शिरवाडे वणी या भागात पाऊस झाला. तर निफाड व परिसरात रात्री २ वाजेच्या सुमारास पाऊस झाला. निफाड तहसील कार्यालयाकडून देण्यात आलेल्या माहितीनुसार तालुक्यातील सात महसूल मंडळांमध्ये पाऊस ३ ते ७ मिलिमीटर पाऊस झाला पण, कोणतेही नुकसान झालेले नाही. दरम्यान, पहाटे दाट धुके पडलेले होते. सकाळी ११ वाजेपर्यंत ढगाळ वातावरण होते. द्राक्ष बागांवर औषधे फवारणीचा खर्च वाढणार आहे.