मुंबई-आग्रा राष्ट्रीय महामार्गावरून मध्य प्रदेशकडून महाराष्ट्रात येणाऱ्या लेनवर तालुक्यातील पळासनेर येथील चारणपाडा जवळ गतिरोधकावर ब्रेक फेल झाला आणि भरधाव वेगात असलेली आरजे ११ जीबी ०८८६ क्रमांकाच्या प्लायवूडने भरलेल्या ट्रकने पुढे चालणाऱ्या एचआर- ४७ डी-०७२१ क्रमांकाच्या कंटेनरला जोरदार धडक दिली. धडक इतकी जोरदार होती की काही अंतरापर्यंत रस्त्यावर कंटेनरला घसरून नेले. त्यामुळे कंटेनर रस्त्यावर पलटी झाला. तर ट्रकमधील चालक आणि सहचालक दोघेही कॅबिनमध्ये दाबले गेल्याने दोघांचा मृत्यू झाला.

अपघाताची माहिती मिळताच ग्रामस्थांनी आणि पोलिसांनी धाव घेत मदत कार्य सुरू केले. तसेच, क्रेनच्या सहाय्याने उलटलेला कंटेनर रस्त्यावरून बाजूला करीत वाहतूक मोकळी केली. तसेच, महामार्ग रुग्णवाहिकेने मनोज जाटव यांचा मृतदेह सकाळी सात वाजेच्या सुमारास रुग्णालयात दाखल करण्यात आला. तर, ट्रकच्या कॅबिनमध्ये अडकलेल्या दुसऱ्या अनोळखी मृतदेहाला बाहेर काढून सकाळी साडे अकरा वाजेच्या सुमारास महामार्ग रुग्णवाहिकेने रुग्णालयात दाखल करण्यात आला. पुढील कारवाईही तालुका पोलीस करीत आहे.

अकोल्यातही भीषण अपघात, एकाचा मृत्यू

तर, अकोला जिल्ह्यातील तेल्हारा तालुक्यातील हिवरखेड तेल्हारा राज्य मार्गावर हिवरखेड ते गोर्धा दरम्यान पंचमुखी हनुमान मंदिराजवळ कार पलटून भीषण अपघात झाल्याची घटना घडली आहे. कारमध्ये माटरगाव येथील ५ जण असल्याची प्राथमिक माहिती मिळत आहे. या अपघातातील एक जण दगावल्याची आणि अन्य चार जखमींमधील दोघांची प्रकृती चिंताजनक असल्याची प्राथमिक माहिती मिळाली. जखमींना उपचारासाठी आधी तेल्हारा आणि नंतर अकोला येथे रुग्णालयात नेल्याची प्राथमिक माहिती. घटनेची माहिती मिळताच हिवरखेड ठाणेदार गजानन राठोड आणि पोलीस ताफा घटनास्थळी हजर झाला. त्यांनी रुग्णवाहिका बोलावून जखमींना रवाना केले.