छगन भुजबळ येवल्यातून विजयी झाले. त्यांनी राष्ट्रवादी काँग्रेस शपचे उमेदवार माणिकराव शिंदे यांचा १९ हजार २९० मतांनी पराभव केला. आता तेच शिंदे राष्ट्रवादी काँग्रेसचे नेते आणि कृषी मंत्री माणिकराव कोकाटेंच्या भेटीला पोहोचले. कृषी मंत्रिपदी वर्णी लागल्याबद्दल शिंदे यांनी कोकाटे यांचं अभिनंदन केलं. कोकाटे आणि शिंदे हे दोन्ही नेते भुजबळ यांचे कट्टर विरोधक मानले जात आहेत.
Chhagan Bhujbal: भुजबळांविरोधात एकी, खातेवाटपानंतर चर्चा ‘त्या’ बॅनर्सची; समीकरणानं कोणाला बळ? कोणाला झळ?
एकीकडे भुजबळ यांचं मंत्रिपद गेलेलं असताना, पक्षात त्यांचं महत्त्व कमी करण्याचे प्रयत्न होत असताना, दुसरीकडे भुजबळ यांच्या विरोधकांची जवळीक वाढताना दिसत आहे. माणिकराव शिंदे यांनी माणिकराव कोकाटे यांचा भव्य नागरी सत्कार करण्याची घोषणा केली आहे. भुजबळ यांचं मंत्रिपद गेल्याबद्दल त्यांनी आनंद व्यक्त केला आहे.

‘आज मला खूप आनंद झालेला आहे. साडे अठरा वर्षांनंतर आम्ही जनतेतला मंत्री पाहत आहोत. जनतेमधील मंत्री कसा असतो, ते आज माणिकराव कोकाटे यांच्या स्वागतासाठी, त्यांच्या अभिनंदनासाठी जमलेल्या गर्दीवरुन अनुभवायला मिळालं. माझ्या हातून भुजबळ पराभूत होण्यापेक्षा राज्यात सरकार येऊन त्यांचं मंत्रिपद जाणं याला नियती म्हणतात. दुसऱ्या माणिकरावांच्या हातून हे घडलं आहे,’ अशा भावना शिंदे यांनी बोलून दाखवल्या.
Chhagan Bhujbal: जो न्याय पाटलांना तो मला का नाही? भुजबळांचा रोकडा सवाल; निशाण्यावर अजित पवार, ऑफरचाही समाचार
माणिकराव कोकाटे यांच्या अभिनंदनासाठी लावण्यात आलेल्या बॅनरवर भुजबळ यांचे फोटो नाहीत. मात्र शिवसेना आमदार सुहास कांदे यांचे फोटो आहेत. कांदे आणि भुजबळ यांच्यातला वाद सर्वश्रृत आहे. कोकाटे आणि भुजबळ हेदेखील कट्टर विरोधक आहेत. सगळेच भुजबळ विरोधक एकत्र येत असल्यानं जिल्ह्यातील राजकारण बदलण्याची शक्यता आहे.