Mumbai Sea Coast Road: २६ जानेवारीला वरळी ते वांद्रे सी लिंक दिशेने जाणारी आंतरबदल मार्गिका आणि प्रभादेवीला जाणारी आंतरबदल मार्गिका सुरू करण्यात येणार आहे. त्यामुळे वाहनचालकांचा प्रवास आणखी सुलभ होणार आहे.

मुंबई : मरीन ड्राइव्ह ते वांद्रे-वरळी सी लिंक दरम्यान आणि त्यापुढे वाहनचालकांचा प्रवास सुसाट करण्यासाठी मुंबई महापालिका प्रयत्न करत आहे. या सागरी किनारा मार्ग प्रकल्पाच्या अंतिम टप्प्यातील सी लिंक विस्तारातील मरीन डाईव्ह ते वांद्रे-वरळी सी लिंकच्या दिशेने जाण्यासाठी शेवटचा गर्डर जोडण्याचे काम पूर्ण झाले आहे. हा टप्पा येत्या प्रजासत्ताक दिनी अर्थात २६ जानेवारीला वाहनचालकांसाठी खुला होईल, अशी माहिती मुंबई महापालिका आयुक्त भूषण गगराणी यांनी दिली.मुंबई सागरी किनारा मार्ग प्रिन्सेस स्ट्रीट उड्डाणपूल ते वांद्रे-वरळी सी लिंकच्या वरळी टोकापर्यंत बांधण्यात येत आहे. १०.५८ किमीचा हा मार्ग आहे. यातील पहिल्या टप्प्यातील वरळी येथील बिंदू माधव ठाकरे चौक ते मरीन ड्राइव्ह दक्षिण वाहिनी ११ मार्च २०२४ रोजी वाहनचालकांसाठी खुली करण्यात आली आणि टप्प्याटप्प्यात अन्य मार्ग खुले केले. त्यानंतर अंतिम टप्प्यातील सी लिंक विस्तारासाठी उत्तरेकडीलही गर्डरची उभारणी नोव्हेंबर अखेरीस पूर्ण करण्यात आली. गर्डर उभारणीनंतर काँक्रीटीकरण, विद्युत खांबांची उभारणी यासह अन्य तांत्रिक कामे पूर्ण केली जात आहेत. जानेवारी २०२५मध्ये हे काम पूर्ण होईल. त्यानंतर अंतिम टप्प्यातील मरीन ड्राइव्ह ते वांद्रे-वरळी सी लिंकच्या दिशेने जाणारा अंतिम टप्प्यातील मार्गही उपलब्ध होणार असून, प्रजासत्ताक दिनी म्हणजेच २६ जानेवारी २०२५ रोजी खुला करण्याचे नियोजन असल्याची माहिती आयुक्त गगराणी यांनी दिली. यामध्ये काही आंतरमार्गिका आहेत. २६ जानेवारीला अंतिम टप्पा पूर्ण होताच सागरी किनारा मार्गातील महत्त्वाचे सर्व टप्पे वाहनचालकांना उपलब्ध होतील.
Chhagan Bhujbal: मी कोणाच्या हातातलं खेळणं नाही; छगन भुजबळ यांचा पक्षनेतृत्वावर हल्लाबोल
प्रवास होणार झटपट
सागरी किनारा मार्गामुळे वरळी सी फेस ते मरीन ड्राइव्ह असा सध्या अर्धा ते पाऊण तासांचा प्रवास दहा ते पंधरा मिनिटांत होण्यास मदत मिळाली आहे. तर, वरळी सी लिंकपर्यंतच्या विस्तारामुळे वांद्रे ते मरीन ड्राइव्ह प्रवासही झटपट होईल. या मार्गावर प्रतितास ८० किमी वेगाने, तर बोगद्यातून प्रतितास ६० किमी वेगाने वाहन चालवण्याची परवानगी आहे.
कांदा दोन हजारांवर! आवक वाढल्याने दरांत मोठी घसरण; निर्यातशुल्क हटविल्यास मिळेल दिलासा
शिवडी न्हावा शेवा-सागरी किनारा मार्गाची जोड
एमएमआरडीएकडून वरळी-शिवडी कनेक्टर बनत आहे. हा कनेक्टर बनल्यानंतर वरळीपासून सागरी किनारा मार्गाला अंडरपास करून जोडण्याचे नियोजन आहे. जे. के. कपूर चौकाजवळच अंडरपास होईल. त्यामुळे नवी मुंबईतून शिवडी न्हावा शेवा मार्गे येऊन पुढे मुंबई सागरी किनारा मार्गावरूनही जाता येणार आहे.
Uddhav Thackeray: मंत्र्यांप्रमाणे मुख्यमंत्रीही अडीच वर्षांनी बदलणार का? उद्धव ठाकरेंचा महायुतीला सवाल
१८पैकी ११ आंतरबदल मार्गिका सुरू
मुंबई सागरी किनारा मार्गातील १८पैकी ११ आंतरबदल मार्गिका सुरू केल्या आहेत. २६ जानेवारीला वरळी ते वांद्रे सी लिंक दिशेने जाणारी आंतरबदल मार्गिका आणि प्रभादेवीला जाणारी आंतरबदल मार्गिका सुरू करण्यात येणार आहे. त्यामुळे वाहनचालकांचा प्रवास आणखी सुलभ होणार आहे.