राज्य विधिमंडळाच्या विशेष अधिवेशनाला आजपासून सुरुवात होतेय. तीन दिवसांच्या या अधिवेशनकाळात आमदारांच्या शपथविधीचा कार्यक्रम तर पार पडणार आहेच, शिवाय विधानसभा अध्यक्षांची निवडणूक देखील होणार आहे. सकाळपासून राज्यभरातील आमदार विधानभवनात दाखल होण्यास सुरूवात झालीये. अशातच आज एक अनपेक्षित घटना घडल्याचं पाहायला मिळालं. भाजप आणि शिवसेना वेगळे झाल्यापासून ते राज्यात शिंदे गटासह भाजपने सत्ता थाटण्यापर्यंत ठाकरे गट आणि भाजपातला वाद टोकाला गेलाय. मात्र आज भाजपचे आमदार सुधीर मुनगंटीवार आणि शिवसेना ठाकरे गटाचे आमदार भास्कर जाधव विधानभवनात एकत्र दाखल झाले. इतकंच नाही तर यावेळी दोघेही हात हात घेऊन आत आले. मुनगंटीवार आणि भास्कर जाधवांच्या या भेटीने आता अनेकांच्या भुवया उंचावल्या आहेत.