• Thu. Dec 26th, 2024
    Nashik News: MPSC च्या परीक्षेला आले अन् आई-बाबा झाले!, पेपर सुरु असतानाच महिलेला प्रसूतीकळा

    Nashik Woman Give Birth To Child During MPSC Exam: परीक्षेसाठी परीक्षाकेंद्रावर पोहोचल्या, पेपरही सुरु झाला. पेपर सुरु होताच परीक्षार्थी महिलेला प्रसूतीकळा सुरु झाल्या.

    महाराष्ट्र टाइम्स

    नाशिक: महाराष्ट्र लोकसेवा आयोगाच्या (एमपीएससी) नागरी सेवा पूर्व परीक्षेसाठी एक दाम्पत्य नाशिकमध्ये रविवारी आले. दोघांची केंद्रे वेगळी होती. परीक्षा केंद्रात पोहोचल्यानंतर महिला परीक्षार्थीला प्रसूतीकळा सुरू झाल्या. त्यातच रक्तस्रावही झाल्याने नियतीने एकाचवेळी दोन्ही बाजूंनी ‘परीक्षा’ घेतली. पण, प्रशासकीय यंत्रणेसह पोलिसांच्या तत्परतेने सारंकाही निभावलं. त्वरित उपचारांमुळे त्या परीक्षार्थीने मुलीला जन्म दिला. युगंधरा गोरख गायकवाड (वय २६, रा. मालेगाव) यांच्या कन्येच्या जन्माची ‘परीक्षा’ सुखरूप निभावल्याचा प्रत्यय आला.

    स्पर्धा परीक्षा उत्तीर्ण होत अधिकारी होण्याचे स्वप्न डोळ्यांत साठवून मालेगावहून युगंधरा व पती गोरख हे रविवारी (दि. १) नाशिकमध्ये परीक्षेसाठी पोहोचले. युगंधरा यांचा कॅनडा कॉर्नर येथील व्ही. एन. नाईक महाविद्यालयात, तर गोरख यांचा रमाबाई आंबेडकर कन्या शाळेत परीक्षेचा बैठक क्रमांक होता. युगंधरा यांना परीक्षा केंद्रावर पोहोचवून गोरख त्यांच्या केंद्रावर पोहोचले. सकाळी नऊ वाजेपासून परीक्षा केंद्रात बसलेल्या युगंधरा यांना पेपर सुरू झाल्यानंतर दहा वाजेच्या सुमारास प्रसूतीकळा सुरू झाल्या. त्यातच रक्तस्रावही सुरू झाला. त्यामुळे पर्यवेक्षक आणि परीक्षार्थींची धांदल उडाली.

    केंद्र प्रमुखांनी तातडीने पोलिसांना माहिती दिल्यावर सरकारवाडा पोलिस ठाण्याचे हवालदार जयंत जाधव व महिला अंमलदार रोशनी भामरे यांनी धाव घेतली. दोन्ही पोलिस कर्मचाऱ्यांनी क्षणाचाही विलंब न करता केंद्रावरील शासकीय वाहनातून युगंधरा यांना उपचारार्थ पंडित कॉलनीतील रुग्णालयात दाखल केले. तेथे प्राथमिक तपासणीनंतर त्र्यंबकेश्वर रस्त्यावरील वेद मंदिराजवळील खासगी रुग्णालयात युगंधरा यांना दाखल करण्यात आले. तेथे त्यांनी मुलीला जन्म दिला. दरम्यान, युगंधरा या गट ब वर्गातील अधिकारीपदाची परीक्षा देत होत्या. त्यांनी बीएस्सी ॲग्री पदवी संपादित केली असून, वर्षभरापूर्वीच त्यांचे लग्न झाले. प्रसूतीची माहिती मिळताच त्यांच्या आई सरला शेवाळे व कुटुंबाने रुग्णालयात धाव घेतली.

    आई अन् बाळ सुखरूप

    पंडित कॉलनीतील रुग्णालयात पोहोचल्यावर युगंधरा यांची तब्येत अधिक खालावली. नऊ महिने होण्यापूर्वीच प्रसूतीकळा सुरू झाल्याने शस्त्रक्रिया करावी लागणार असल्याचे सांगत डॉक्टरांनी मोठ्या रुग्णालयात नेण्याचा सल्ला दिला. अंमलदार जाधव यांनी तातडीने दुसऱ्या रुग्णालयात फोन करून घटनेची माहिती दिली. त्यामुळे दुसऱ्या रुग्णालयात युगंधरा पोहोचण्यापूर्वी त्यांच्या शस्त्रक्रियेसाठीची संपूर्ण तयारी केली होती. दरम्यान, परीक्षा केंद्रावरील यंत्रणा व दोन्ही पोलिस अंमलदारांनी तातडीने मदत केल्याने महिलेसह बाळ सुखरूप असल्याचे डॉक्टरांनी सांगितले. गायकवाड दाम्पत्याच्या नातलगांनीही पोलिसांनी आभार मानले.

    Nashik News: MPSC च्या परीक्षेला आले अन् आई-बाबा झाले!, पेपर सुरु असतानाच महिलेला प्रसूतीकळा

    युगंधरा यांना रुग्णालयात दाखल केल्यावर दोन्ही पोलिसांनी त्यांचे पती व चुलत बंधूंचा मोबाइल क्रमांक मिळवला. त्यावेळी पती गोरख हेदेखील परीक्षेसाठी नाशिकमध्ये असल्याचे समजते. मुंबईनाका पोलिसांना ‘कॉल’ देत गोरखपर्यंत निरोप पोहोचविण्यास सांगण्यात आले. मुंबईनाका पोलिसांनी रमाबाई आंबेडकर शाळेत पर्यवेक्षकांद्वारे गोरख यांना ‘गोड बातमी’ कळवली. पहिल्या सत्राचा पेपर संपताच गोरख यांनी रुग्णालय गाठून नवजात बाळासह पत्नीची भेट घेतली.

    नुपूर उप्पल

    लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा

    Leave a Reply

    Your email address will not be published. Required fields are marked *

    You missed