शहांची भेट घेऊन शिंदे, फडणवीस, अजित पवार मुंबईत परतले. आज महायुतीची महत्त्वाची बैठक होती. पण शिंदे अचानक त्यांच्या गावी निघून गेले. संध्याकाळच्या सुमारास शिंदे हेलिकॉप्टरनं साताऱ्यातील दरे गावी पोहोचले. शिंदे दोन दिवस मुक्कामी असणार आहेत. यामुळे आता आणखी दोन दिवस सत्ता स्थापनेची चर्चा बारगळणार आहे. काल चेहऱ्यावर दिसलेली नाराजी, त्यानंतर आज अचानक गाठलेलं गाव यामुळे शिंदेंच्या मनात नेमकं चाललंय, असा प्रश्न अनेकांना पडला आहे.
तीन दिवस लगबग, ‘वर्षा’वर लक्षवेधी हालचाली; अखेर त्यांना अश्रू अनावर, शिंदे निघताच ढसाढसा रडले
शिंदे ठाण्यातून दुपारी २ वाजता साताऱ्याला जाण्यास निघणार होते. दुपारी ३ वाजता ते साताऱ्यात पोहोचणार होते. तशी अधिकृत माहिती देण्यात आली होती. शिंदे यांचा कार्यक्रम तसाच होता. पण शिंदे दुपारी वर्षावर असताना त्यांना भेटण्यासाठी प्रहारचे नेते बच्चू कडू पोहोचले. राष्ट्रवादी शपचे आमदार जितेंद्र आव्हाडही वर्षावर गेले. त्यामुळे या नेत्यांची भेट घेऊन निघेपर्यंत संध्याकाळ झाली.

एकनाथ शिंदेंना भेटून निघणाऱ्या जितेंद्र आव्हाडांना पत्रकारांनी बैठकीबद्दल विचारलं. त्यावर त्यांनी बोलणं टाळलं. शिंदे अचानक गावी का निघालेत, असा प्रश्न माध्यमांनी आव्हाड यांना विचारण्यात आला. त्यावर मी याबद्दल शिंदे साहेबांना विचारलं. सततच्या भेटीगाठी, दौऱ्यांमुळे थकवा आला. त्यामुळे आराम करण्यासाठी गावाला जात असल्याचं ते म्हणाले, असं आव्हाडांनी माध्यमांना सांगितलं.
लाडक्या बहिणींचं महायुतीला जोरदार मतदान; नव्या सरकारमध्ये महिलांना खास स्थान, कोणाला संधी?
‘मुंबई, ठाण्यात असताना अनेक जण भेटायला येतात. दिवसरात्र भेटीगाठी सुरु असतात. यामुळे थकवा आला आहे. सततच्या दौऱ्यांमुळे आराम मिळत नव्हता. त्यामुळे आरामासाठी २ दिवस गावी जात आहे. तिथे जाऊन शेतीत लक्ष घालेन. गेल्या अनेक दिवसांपासून २४ तास राजकारण सुरु आहे. त्यातून थोडं बाहेर पडण्यासाठी, मनाला थोडी उसंत मिळावी यासाठी गावी चाललोय, असं शिंदेंनी मला सांगितलं,’ अशी माहिती आव्हाडांनी दिली.