अमुलकुमार जैन, रायगड : अभियांत्रिकी महाविद्यालयाच्या तिसऱ्या वर्षाची फी भरण्यासाठी पैसे नसल्याने आकाश राजाराम वळकुंडे (राहणार – प्रदिप म्हात्रे यांचे चाळीत, घर नंबर १६२, मु.पो. पुंडे, ता. उरण, जि. रायगड. मुळ राहणार – मु.पो. घेरडी, ता. सांगोळा, जि. सोलापूर ) याने रायगड जिल्ह्यातील पनवेल शहरातील उरण नाका परिसरात असलेल्या कोळेश्‍वर चौक येथील पुजारा टेलिकॉम दुकानात दरोडा टाकून लाखों रुपयांच्या मोबाईल फोनवर डल्ला मारला. मात्र, तो आता नवी मुंबई येथील सीबीडी बेलापुर रेल्वे स्थानक पार्किंग परिसरातून पोलिसांच्या जाळ्यात सापडला असल्याची माहिती गुन्हे शाखा कक्ष २ पनवेल यांच्याकडून मिळाली आहे.

पुजारा टेलीकॉम शॉपचे शटर कोणीतरी अज्ञात चोरट्याने कडी कोयंडा कापून दुकानामधील विक्रीस ठेवलेले नवीन आणि जुने असे २३ लाख ९५ हजार रूपये किंमतीचे एकूण ५५ मोबाईल फोन चोरी करून आरोपी फरार झाला होता. चोरीची माहिती पोलिसांना मिळाल्यानंतर पनवेल शहर पोलिसांनी घटनास्थळी जाऊन पंचनामा करून अज्ञात आरोपीविरोधात चोरीचा गुन्हा नोंद केला होता.पोलीस पथकाने घटनास्थळाची पाहणी करून आरोपी येण्याजाण्याच्या मार्गावरील सीसीटीव्ही कॅमेऱ्यांच्या फुटेजची पाहणी केली असता गुन्ह्यातील आरोपी घटनेच्या रात्री मोटरसायकलवरून घटनास्थळ परिसरात वावरत असल्याचे दिसून आले. आरोपी हा उरण परिसरातील असल्याची माहिती मिळाली होती. त्यानुसार आरोपीला पनवेल गुन्हे शाखा कक्ष २च्या पथकाने २१ नोव्हेंबर रोजी पहाटे बेलापूर येथून अटक केली. आरोपीची तपासणी केली असता आरोपीकडून पोलिसांनी आतापर्यंत ४१ मोबाईल ज्यांची किंमत १९ लाख २२ हजार ७७१ रुपये इतकी आहे ते हस्तगत केले आहेत. हे मोबाईल कोणाचे आहेत, याची चौकशी केल्यानंतर हे मोबाईल चोरीचे असल्याची कबूली आरोपी आकाशने दिली.

आकाश उरणमध्ये आपल्या आई आणि बहिणीसोबत राहत राहतो. सध्या आकाश इलेक्ट्रॉनिक इंजिनिअरिंगच्या तिसऱ्या वर्षात नवी मुंबई परिसरातील एका नामांकित महाविद्यालयात अभियांत्रिकीचे धडे गिरवत होता. मात्र हे धडे गिरवताना आकाशचा निर्णय चुकला आणि आकाश पोलिसांच्या जाळ्यात अडकला. ही चोरी का केली याची विचारणा केली असता अभियांत्रिकी महाविद्यालयाच्या तिसऱ्या वर्षाची फी भरण्यासाठी माझ्याकडे पैसे नसल्याची माहिती आकाशने पोलिसांना दिली. पोलिसांनी आरोपीकडून लाखो रुपयाचा मुद्देमाल देखील जप्त केला आहे.
सदर गुन्ह्यातील आरोपीचा शोध पोलीस आयुक्त, नवी मुंबई मिलिंद भारंबे, अप्पर पोलीस आयुक्त गुन्हे दिपक साकोरे, पोलीस उप.आयुक्त गुन्हे, अमित काळे यांचे मार्गदर्शनाखाली तसेच सपोआ, गुन्हे शाखा अजयकुमार लांडगे यांच्या पर्यवेक्षणाखाली गुन्हे शाखा कक्ष २ नेमणूकीतील वरिष्ठ पोलीस निरीक्षक, उमेश गवळी, सपो.नि. प्रविण फडतरे, अजित कानगुडे, पोउपनि प्रताप देसाई, मानसिंग पाटील, माधव इंगळे, अभयसिंह शिंदे, पोलीस हवालदार रमेश शिंदे, अनिल पाटील, प्रशांत काटकर, मधुकर गडगे, तुकाराम सुर्यवंशी, रणजित पाटील, निलेश पाटील, इंद्रजित कानु, रूपेश पाटील, सागर रसाळ, दिपक डोंगरे, अजित पाटील, पोलीस नाईक अजिनाथ फुंदे, पोलीस शिपाई लवंकुश शिंगाडे, विकांत माळी यांनी केली आहे.