नांदेड जिल्ह्यात नऊ विधानसभा क्षेत्राचा समावेश आहे. तर, लोकसभा क्षेत्रात सहा मतदार क्षेत्र येतात. २०१९ च्या निवडणुकीत जवळपास ६८ टक्के मतदान झालं होतं. यंदा ६५ टक्के इतक्या मतदानाची नोंद झाली आहे. जिल्ह्यातील भोकर आणि लोहा या मतदारसंघाकडे राज्याचं लक्ष लागलं होतं. भोकर मतदार संघातून माजी मुख्यमंत्री अशोक चव्हाण यांची कन्या श्रीजया चव्हाण आणि काँग्रेसकडून पप्पू पाटील कोंढेकर यांच्यात सामना पहायला मिळाला. भोकरमध्ये ७५ टक्के मतदान झालं. याचा फायदा कोणाला बसणार याकडे सर्वांच लक्ष लागलं आहे. तर, दुसरीकडे लोकसभा निवडणुकीत पराभव झाल्यानंतर माजी खासदार प्रताप पाटील चिखलीकर यांनी लोहा मतदार संघातून विधानसभेची निवडणूक लढवली. या मतदार संघात प्रताप पाटील चिखलीकर आणि आशा शिंदे या बहीण भावामध्ये निवडणूक रंगली.
Devendra Fadnavis: देवेंद्र फडणवीसांची मतदारसंघात ‘चहा’गिरी, कार्यकर्त्यांशी संवाद साधला
माजी मुख्यमंत्री अशोक चव्हाण, प्रताप पाटील चिखलीकर, आमदार हेमंत पाटील यांची प्रतिष्ठा पणाला लागली आहे. दरम्यान, अशोक चव्हाण यांची कोंडी करण्यासाठी काँग्रेसकडून देखील रणनीती आखल्या गेली. काँग्रेस नेत्यांनी भोकरकडे लक्ष दिल्याने चव्हाण यांना आपल्या लेकीसाठी भोकर मतदारसंघातच तळ ठोकावे लागले. अनेक मतदारसंघात दुहेरी, तिहेरी आणि चौरंगी लढत पहायला मिळाली. विशेष म्हणजे या निवडणुकीत मराठा आरक्षणाचा मुद्दा चालला नसला तरी, जातीय समीकरण पहायला मिळाले. याचा फटका कोणाला बसणार हा चर्चेचा विषय बनला आहे. दरम्यान, मतदानानंतर आकडेमोडची चर्चा देखील सुरु आहे. उमेदवारासह नेत्यांना आपली प्रतिष्ठा राखण्यात यश मिळेल का हे येत्या शनिवारी स्पष्ट होणार आहे.

सर्वाधिक मतदार भोकर, तर सर्वाधिक कमी मतदान नांदेड उत्तर मतदारसंघात

नऊ विधानसभेसाठी बुधवारी मतदान पार पडले. सर्वाधिक मतदान भोकर मतदार संघात झाले. तर सर्वात कमी मतदानाची नोंद नांदेड उत्तर मध्ये झाली. भोकर मतदार संघात ७५ टक्के, देगलूर मतदार संघात ५९.७५ टक्के, हदगाव मतदार संघात ७०.४० टक्के, किनवट मतदार संघात ७०.०५ टक्के, लोहा मतदार संघात ६७.६१ टक्के, मुखेड मतदार संघात ५९.७८ टक्के, नायगाव मतदार संघात ६९.७८ टक्के, नांदेड उत्तर मतदार संघात ५६.६५ टक्के आणि
नांदेड दक्षिण मतदार संघात ५८.०२ टक्के इतक्या मतदानाची नोंद झाली आहे.

लोकसभा पोटनिवडणुकीसाठी ६२.८९ टक्के मतदान

खासदार वसंत चव्हाण यांच्या निधनाने रिक्त झालेल्या जागेसाठी बुधवारी मतदान घेण्यात आले. मागच्या निवडणुकीपेक्षा २ टक्क्याने मतदान वाढले आहे. ६२. ८९ इतकं मतदान झालं आहे. लोकसभा पोटनिवडणुकीत काँग्रेसकडून रविंद्र चव्हाण तर भाजपकडून संतुक हंबर्डे यांच्यात लढाई पहायला मिळाली. काँग्रेसला सहानभूतीचा फायदा होणार का हे शनिवारी स्पष्ट होणार आहे.