मिळालेल्या माहितीनुसार डिगंबर गुलाबराव देशमुख हे काटा गावाकडून दुचाकीवर वाशिमकडे जात होते. तर बालू दगडू लगड हे वाशिमकडून काटा गावाकडे ट्रॅक्टरने जात होते. दोन्ही वाहन वेगात जात असताना बाकलीवाल यांच्या विहिरीजवळ दोन्ही वाहनांचा समोरासमोर भीषण अपघात झाला. यावेळी दुचाकीवर जाणारे देशमुख लांब रस्त्यावर फेकले गेले, त्यामुळे त्यांना जबर मार लागून त्यांचा जागीच मृत्यू झाला.अपघात झाल्यानंतर ट्रॅक्टर रस्त्याच्या कडे जाऊन पलटी झाला. ट्रॅक्टर पलटी झाल्याने चालक वाहनाखाली दबल्या गेला आणि त्याचाही जागीच मृत्यू झाला.
BJP Leader Murder: मोठी बातमी! भाजप नेत्याची हत्या, भररस्त्यात कुऱ्हाडीने वार करत संपवलं, सांगली हादरली
अपघात झाल्याची माहिती मिळताच वाशिम ग्रामीण पोलीस स्टेशनच्या पोलीस निरीक्षक श्रीदेवी पाटील यांनी पोलीस कर्मचाऱ्यांसह अपघातस्थळ गाठून घटनास्थळाचा पंचनामा केला आणि दोन्ही मृतदेह शवविच्छेदनासाठी जिल्हा सामान्य रुग्णालयात आणून शवविच्छेदन केले. रात्री त्यांचावर अंत्यसंस्कार करण्यात आले.

अपघातात मृत्यू झालेले ४८ वर्षीय बालू लगड आणि ६८ वर्षीय डिगंबर देशमुख हे दोघेही काटा या एकाच गावातील रहिवाशी होते. डिगंबर आणि बालू दोघेही एकमेकांना सुपरिचित होते. समोरासमोर वाहन धडकून झालेल्या अपघातात दोघांचाही दुर्देवी मृत्यू झाल्याने संपूर्ण गावावर शोककळा पसरली आहे. अपघाताची नोंद ग्रामीण पोलीस स्टेशनमध्ये करण्यात आली असून पुढील तपास पोलीस करत आहेत.

देशमुखांनी दिली दत्त मंदिर बांधण्यासाठी जागा दान

अपघातात मृत्यू झालेले डिगंबर देशमुख यांच्या शेतात एकमुखी दत्ताचे मंदिर असून मंदिरासाठी त्यांनी जागा दान दिली आहे. ते दत्ताचे परमभक्त होते. दरवर्षी ते येथे भाविकांसाठी महाप्रसादाचे आयोजन करायचे. त्यांच्या अपघाती मृत्यूने सर्वत्र हळहळ व्यक्त केली जात आहे.