नागपूर: भाजपचे वर्धेचे लोकसभेचे उमेदवार रामदास तडस यांच्या सून पूजा तडस यांनी आज शिवसेना उद्धव ठाकरे गटाच्या नेत्या सुषमा अंधारे यांच्यासोबत पत्रकार परिषद घेत रामदास तडस आणि मुलगा पंकज तडस यांच्यावर गंभीर आरोप केले. तसेच, नरेंद्र मोदी यांनी मला न्याय द्या अशी मागणी केली आहे. तसेच, यावेळी त्यांनी सांगितलं की माझ्या बाळाचे वडील कोण असा प्रश्न केला जातो, स्वत: रामदास तडस यांनी मला डीएनए टेस्ट कर असं सांगितलं, त्यामुळे समाजात माझ्याकडे घाणेरड्या नजरेने पाहिलं जातं. जर एक लोकप्रतिनिधी आपल्या सूनेला न्याय देऊ शकत नसेल तर तो समाजाला काय न्याय देणार, असं म्हणत त्यांनी रामदास तडस यांच्यावरही निशाणा साधला.

बाळाच्या डीएनए टेस्टची मागणी, अपमानास्पद वागणूक, मोदींनी मला न्याय द्यावा – पूजा तडस

गेल्या काळात कशा प्रकारे लग्न झालं हे तुम्ही बघितलं. कशाप्रकारे स्वत:च्या मुलाला बलात्काराच्या आरोपातून वाचवण्यासाठी फक्त माझ्याशी लग्न करुन दिलं, मला एका फ्लॅटवर नेऊन टाकण्यात आलं, तिथे ज्या पद्धतीने माझ्याशी वागणूक झाली, तिथे माझा फक्त उपभोगाची वस्तू म्हणून वापर करण्यात आला, त्यातून या बाळाचा जन्म झाला. हे बाळ जन्माला आल्यानंतर हे बाळ कोणाचं आहे, या बाळाचा डीएनए कर असे आरोप लावण्यात आले, जेव्हा एक लोकप्रतिनीधी खासदार हे म्हणतो की डीएनए कर, प्रत्येकवेळी माझ्यावर अपमानास्पद आरोप केले गेले, जेव्हा मी त्यांच्या घरी गेली तेव्हा मला लोखंडी रॉडने मारहाण करण्यात आली, त्याचे पुरावेही मी दिले होते, एका स्त्रीवर तुम्ही एवढे अत्याचार करता, आज माझं छोटसं बाळ आहे, त्याला घेऊन मी दारोदारी फिरत आहे, जिथे मी राहत होती, तो फ्लॅट विकून मला बेघर करण्यात आलं. जर तुम्ही एका लहान मुलासोबत राजकारण करु शकता तर माझ्यासारख्या महिलांनी जायचं कुठे,
दानवे विरुद्ध काँग्रेसचा बडा नेता, जालन्यात २००९ सारखी लढत, कल्याण काळे बदला घेणार?
तडस साहेब म्हणतात मी माझ्या मुलाला बेदखल केलं, मग तुम्ही त्याला घरात का ठेवता, मला एकटीला घराबाहेर का काढलं, जर तुम्ही महिलांना ३३ टक्के आरक्षण आणि महिला सशक्तीकरण सारख्या गोष्टी करता तर मग मला न्याय का मिळत नाही,

मोदी म्हणतात देश माझा परिवार, त्याच परिवारातील रामदास तडस यांच्यासाठी मोदी २० तारखेला वर्धेत येणार आहेत. मी त्यांच्याकडे एकच विनंती करते की मी जर तुमच्या परिवारातील भाग आहे तर या बाळाला न्याय द्या, या बाळाच्या आणि माझ्या अस्तित्वाचा प्रश्न आहे, आज जेव्हा मी समाजासमोर जाते तेव्हा माझ्याकडे घाणेरड्या नजरेने बघितलं जातं, या बाळाचा बाप कोण अशा शब्दात माझी अवहेलना केली जाते, आज मी आहे उद्या माझ्यासारख्या दहा पूजा समोर येतील, माझा अपराध काय हे सांगा, मी डीएनए करायला तयार, फक्त ते कोर्टातून करा, समाजासमोर करा, पण माझी अशी अवहेलना करु नका.

पंतप्रधान नरेंद्र मोदी यांनी वर्धेत आल्यावर मला थोडा वेळ द्या, माझी समस्या जाणून घ्या. जर एक लोकप्रतिनीधी जर आपल्या सूनेला न्याय देऊ शकत नाही, तर ते समाजाला काय न्याय देतील.

नेमकं प्रकरण काय?

दोन वर्षांपूर्वी पंकज तडस यांच्यावर पूजा तडस यांच्यावर अत्याचार केल्याचा आरोप होता. त्याप्रकणी पोलिसात मारहाण आणि जीवाला धोका असल्याची तक्रारही करण्यात आली होती. त्यानंतर पंकज तडस आणि पूजा तडस यांचा विवाह झाला होता. मग मारहाण आणि जीवाला धोका ही तक्रारही मागे घेतली होती. महिला आयोगाच्या अध्यक्षा रुपाली चाकणकर यांनी एक व्हिडिओ ट्वीट करुन हे प्रकरण समोर आणलं होतं. पूजाला पोलिस सुरक्षाही देण्यात आली होती. रामदास तडस यांनी माझ्या बदनामीसाठी राजकारण केलं जातंय अशी प्रतिक्रिया त्यांनी दिली होती. सूनेला स्वीकारायला मी तयार आहे, अशी भूमिका त्यांनी तेव्हा घेतली होती. माझ्या वडिलांचा आणि माझा कोणताही संबंध नाही, असं पंकज तडस यांनी दोन वर्षांपूर्वी सांगतलं होतं. राजकारण करुन माझ्या वडिलांना बदनाम करण्याचा कट रचल्याचा आरोपही पंकज यांनी केला होता.