निलेश पाटील, जळगाव : एकनाथ खडसे यांना राष्ट्रवादीमध्ये प्रवेश दिला आणि विधानपरिषदेचे आमदार केले ही आपली सर्वांत मोठी चूक झाल्याची कबुली शरद पवार यांनी आपल्या जवळ दिल्याची माहिती माजी मंत्री सतीश पाटील यांनी दिली. एकनाथ खडसे यांच्या भाजप प्रवेशाच्या वृत्ताने शरद पवार यांना दु:ख झाले, असेही सतीश पाटील म्हणाले.एकनाथ खडसे यांनी राष्ट्रवादीमध्ये येताना उत्तर महाराष्ट्रमध्ये राष्ट्रवादीची ताकद वाढविण्याचे आश्वासन शरद पवार यांना दिले होते. राष्ट्रवादी पक्ष वाढला तर नाहीच उलट राष्ट्रवादी पक्षाचे वाटोळे झाल्याची टीका पाटील यांनी केली. राष्ट्रवादीकडून रावेर मतदारसंघात एकनाथ खडसे यांचे उमेदवारीसाठी नाव आले होते. मात्र त्यांनी आजारपणाचे कारण देत निवडणूक लढविण्यास नकार दिल्याने पक्षाने श्रीराम पाटील यांना उमेदवारी दिली.
रावेर लोकसभेसाठी शरद पवारांचा मास्टरस्ट्रोक, उमेदवारीसाठी उद्योजक श्रीराम पाटलांचे नाव निश्चित

पक्ष वाढला नाही, खडसेंऐवजी प्रामाणिक कार्यकर्त्याला संधी द्यायला हवी होती

एकनाथ खडसे हे आपल्या स्वार्थासाठी राष्ट्रवादीमध्ये येत असल्याचे मी शरद पवार यांना सांगितले होते, असे सांगतानाच त्यावेळी मी तुमचे ऐकायला हवे होते, अशी कबुली पवारांनी दिल्याचे सतीश पाटील म्हणाले. एकनाथ खडसे यांच्याऐवजी एखाद्या होतकरू आणि प्रामाणिक कार्यकर्त्याला संधी दिली असती तर आज जिल्ह्यात पक्षाची ताकद चार पटींनी वाढली असती, शिवाय रावरेसाठी उमेदवार शोधण्याचा जो त्रास झाला तोही झाला नसता, असेही सतीश पाटील म्हणाले.
खडसेंच्या भाजपप्रवेशाने खळबळ, रावेरच्या उमेदवार निश्चितीसाठी NCP वर दबाव, ‘मोदी बागेत’ बैठक

रोहिणी खडसेंकडे पद ठेवले तर लोकांमध्ये चुकीचा मेसेज जाईल

एकनाथ खडसे भाजपामध्ये जात असताना रोहिणी खडसे या राष्ट्रवादीमध्येच राहत आहेत. त्यांच्याकडे आपण महिला प्रदेशाध्यक्ष कायम ठेवले तर लोकांमध्ये चुकीचा मेसेज जाईल, असेही आपण पवारांना सांगितल्याचे सतीश पाटील म्हणाले. रोहिणी खडसे यांनी लोकसभा निवडणुकीत आपल्या राष्ट्रवादीच्या उमेदवारासाठी तन-मन-धनाने निवडणुकीत काम करावे आणि तसे झाले आणि रिझल्ट दाखविला तरच त्यांचा विधानसभेसाठी विचार करावा, असे पवारांना सुचविल्याचे सतीश पाटील म्हणाले. कारण सुनेच्या उमेदवारीसाठी त्यांनी आपल्याला आजारपणाचे कारण दिले. त्यांची ही खेळी आता उघडी पडल्याचे पाटील म्हणाले.

१० वर्षात जिल्ह्यासाठी काय केले?

भाजपा नेते गिरीश महाजन हे सध्या हवेत आहेत. गेल्या दहा वर्षात त्यांनी जिल्ह्यासाठी काय केले हे सांगायला पाहिजे. पाच लाखांनी आपला उमेदवार निवडून येईल असे ते ओव्हर कॉन्फिडन्सने सांगत आहेत. याचा अर्थ त्यांनी मतांची काही जुळवाजुळव केली आहे की पाच लाख मतांचा घोटाळा केला आहे ते चार जूनला स्पष्ट होईल. तुमचे एवढी चांगली परिस्थिती होती तर मग सीटिंग खासदार तुम्हाला का सोडून गेले? याचा विचारही त्यांनी करायला पाहिजे, अशी टीका सतीश पाटील यांनी मंत्री गिरीश महाजन यांच्यावर केली.