चंद्रपूर : सत्तेत असताना काँग्रेसने धर्माच्या नावावर देशाचे विभाजन केले. काश्मिरात समस्या निर्माण करून दहशतवाद्यांना संरक्षण दिले. अयोध्येतील मंदिराच्या निर्माणकार्यात अडचणी आणल्या. रामाच्या अस्तित्वावरच प्रश्नचिन्ह उपस्थित केले. आता तर त्यांच्या घोषणापत्रात मुस्लिम लीगची भाषा दिसते. काँग्रेस ही समस्यांची जननी आहे. त्यांच्यात सुधारणेची कुठलीच शक्यता नाही, अशी टीका पंतप्रधान नरेंद्र मोदी यांनी सोमवारी केली. येथील मोरवा विमानतळाच्या पटांगणावर मोदी यांची ही सभा झाली. या सभेतून त्यांनी महाराष्ट्रातील लोकसभा निवडणुकीचे रणशिंग फुंकले.चंद्रपूर आणि गडचिरोली-चिमूर लोकसभा मतदारसंघातील भाजप उमेदवार सुधीर मुनगंटीवार (चंद्रपूर), अशोक नेते (गडचिरोली-चिमूर) यांच्या प्रचारार्थ आयोजित या सभेत मुख्यमंत्री एकनाथ शिंदे, उपमुख्यमंत्री देवेंद्र फडणवीस, केंद्रीय राज्यमंत्री रामदास आठवले, राष्ट्रीय मागासवर्ग आयोगाचे अध्यक्ष हंसराज अहिर, भाजपच्या ज्येष्ठ नेत्या शोभाताई फडणवीस, आमदार किशोर जोरगेवार, आमदार बंटी भांगडिया आदी व्यासपीठावर उपस्थित होते.
रावेर लोकसभेसाठी शरद पवारांचा मास्टरस्ट्रोक, उमेदवारीसाठी उद्योजक श्रीराम पाटलांचे नाव निश्चित

‘लाल आतंक’ कुणाची देण होती, मागासवर्गाला कुणी दगा दिला, असे सवाल उपस्थित करीत पंतप्रधान मोदी म्हणाले, काँग्रेसला सत्ता मिळाली की मलाई खातात. आपल्या सत्ताकाळात त्यांनी महाराष्ट्राची उपेक्षा केली. परिवाराचा विकास करताना देशाच्या विकासाला ब्रेक लावला. समृद्धी महामार्गाला विरोध केला. जलयुक्त शिवार, मुंबई मेट्रो, कोकण रिफायनरी, आवास आणि बळीराजा संजीवनी योजना बंद केल्या. आम्ही विदर्भच नव्हे, तर अवघ्या महाराष्ट्राच्या विकासासाठी योजना सुरू केल्या. दलित, मागास, आदिवासींना घरे दिली. पाणी, रस्ते आणि शिक्षणाची गॅरंटी दिली. त्यांचे जीवनमान बदलले. आजवर चार कोटी लोकांना घरे मिळाली आहेत. गरिबांना मोफत उपचाराची सोय उपलब्ध करून देताना शेतकऱ्यांसाठी सन्मान योजना राबविली. आपल्या मतदानाच्या ताकदीमुळे हा विकास घडून आला. या प्रत्येक पुण्यकार्याचे तुम्हीच निर्माते आहात, असेही मोदी म्हणाले. मनात सकारात्मक भाव असले की त्याचे परिणामही सकारात्मक येतात हे यातून दिसल्याचा विश्वास व्यक्त केला. मतदानाचे विक्रम मोडा, मतदान वाढवा, असे आवाहनही मोदी यांनी यावेळी केले.

‘कडू कारले तुपात तळले…’

‘माता महाकालीच्या पानवभूमीत शक्तीला नमन करतो, भारतरत्न डॉ. बाबासाहेब आंबडेकर यांना नमन, चंद्रपूरकरांना नमस्कार,’ अशी मराठीतून त्यांनी आपल्या भाषणाची सुरुवात केली. ‘कडू कारले तुपात तळले, साखरेत घोळले तरी कडू ते कडूच’ या म्हणीतून विरोधकांवर टीकाही केली. समस्त बंधूभगिनींना नववर्ष व गुढीपाडव्याच्या शुभेच्छा दिल्या.

दहा वर्षांत नक्षलवाद कमजोर

काँग्रेस दहा वर्षांपासून सत्तेबाहेर असल्याने देशातील मोठ्या समस्येचा कायमस्वरूपी उपचार करता आला. नक्षलवाद कमजोर झाला. गडचिरोलीची चर्चा विकास आणि ‘स्टील सिटी’ म्हणून होऊ लागली आहे. ‘पोलाद सिटी’ म्हणून गडचिरोली ओळखले जात आहे, असेही मोदी म्हणाले. इंडिया आघाडी दक्षिण भारताला वेगळे करण्याची भाषा बोलतात. मुख्यमंत्री एकनाथ शिंदे यांची शिवसेना बाळासाहेब ठाकरे यांचे विचार पोहचविते. नकली शिवसेनावाले महाराष्ट्रात रॅली काढतात, असा टोलाही मोदी यांनी मारला.