गडचिरोली: माओवादविरोधी अभियान राबविणाऱ्या पोलिसांच्या रेकीचा प्रयत्न करणाऱ्या तीन माओवाद्यांना अटक करण्यात आली आहे. यात काजल उर्फ सिंधू गावडे, गीता उर्फ सुकली या दोन महिला माओवाद्यांसह पिसा नरोटे या जनमीलिशिया सदस्याचा समावेश आहे. या तिघांवर पाच लाख रुपयांचे बक्षीस आहे. काजल आणि गीता यांचा जंगलात पोलीस दलावर हल्ले करण्यासह अनेक गंभीर गुन्ह्यांमध्ये प्रत्यक्ष सहभाग आहे.
भैरवगडावर भ्रमंतीला गेलेल्या पर्यटकांवर मधमाशांचा हल्ला, पर्यटक गंभीर जखमी, उपचार सुरू
काजल ही २०१२मध्ये प्लाटून क्रमांक ५५मध्ये सदस्य म्हणून दाखल झाली. कंपनी चारमध्ये ही कार्यरत होती. यानंतर विभागीय समितीमध्ये ती ‘स्टाफ टीम’ आणि ‘प्रेस टीम’मध्ये सदस्यपदावर कार्यरत होती. काजलवर चकमकीचे सात गुन्हे दाखल आहेत. सुरक्षा दलांना लक्ष्य करण्यासाठी जमिनीत स्फोटके पुरून ठेवण्याच्या दोन घटनांमध्ये काजलचा सहभाग होता. गीता ही २०१८मध्ये भामरागड दलमध्ये सदस्य म्हणून दाखल झाली. ती सध्या माड एरिया समितीत सदस्य म्हणून कार्यरत होती. गीतावर चकमकीचे तीन गुन्हे दाखल आहेत.यासोबतच २०२०मध्ये कोपर्शीच्या जंगलात झालेल्या चकमकीत दोन पोलीस शहीद झाले होते. या घटनेत गीताचा सहभाग होता. याच वर्षी कोठी येथे झालेल्या एका पोलीस जवानाच्या हत्येत ही प्रत्यक्ष सहभागी होती. याच भागातील एका आदिवासीच्या हत्येतही गीताचे नाव आले होते. जनमिलिशिया सदस्य असलेला पिसा पांडू नरोटे हा २०१८पासून माओवाद्यांसाठी अन्नधान्याचा पुरवठा करणे, त्यांचे हत्यार सुरक्षित ठिकाणी दडवून ठेवणे, रेकी करून माओवाद्यांना माहिती देणे, पोलीस पथकाबद्दल माहिती देणे, माओवाद्यांची पत्रके जनतेपर्यंत पोहोचविणे, असे आरोप त्याच्यावर आहेत. नरोटे याच्यावर खुनाचे तीन गुन्हे दाखल आहेत.

मागील काही वर्षांत पोलिसांनी माओवादविरोधी अभियान अधिक तीव्र केले आहे. त्याचा परिणाम म्हणून २०२२पासून आतापर्यंत ७७ माओवाद्यांना अटक करण्यात आली आहे. येत्या काळात लोकसभा निवडणुकीच्या पार्श्वभूमीवर पोलीस अधिक दक्ष असल्याचे पोलीस अधीक्षक निलोत्पल यांनी ‘मटा’शी बोलताना सांगितले.