अक्षय शिंदे, जालना : लोकसभेसाठी वंचित बहुजन आघाडीकडून जाहीर करण्यात आलेल्या दुसऱ्या यादीत जालना लोकसभेसाठी प्रभाकर बकले यांना उमेदवारी जाहीर करण्यात आलेली आहे. महायुतीकडून जालना लोकसभेसाठी रावसाहेब दानवे यांना उमेदवारी जाहीर करण्यात आलेली आहे. मात्र अद्यापही महाविकास आघाडीकडून कोणताही उमेदवार जाहीर करण्यात आलेला नाही. मात्र बकले यांच्या उमेदवारीने राजकीय वातावरण ढवळणार असून मतदारसंघात वंचितची उमेदवारी कोणाच्या पथ्यावर पडणार कोणाला फटका पडनार याची चर्चा सुरु आहे.
कोण आहेत बकले?
प्रभाकर देवमन बकले मूळचे छत्रपती संभाजीनगर जिल्ह्यातील फुलंब्री तालुक्यातले रहिवाशी आहेत. त्यांनी भारतीय भटके विमुक्त आदिवासी ओबीसी संघर्ष महासंघाचे मराठवाडा कार्याध्यक्ष म्हणून कारभार पाहिला असून, धनगर समाज संघर्ष समिती ते राज्य समन्वयक आहेत. वंचित बहुजन आघाडीत गेल्या ८ वर्षापासून ते सक्रीय आहेत, त्यांनी या काळात धनगर समाजाच्या आंदोलनात सक्रीय सहभाग घेतला असून त्यांनी मराठा, भटक्या विमुक्तांबरोबर मुस्लिम आरक्षण आणि विविध प्रश्नांवर त्यांनी आंदोलनात सहभाग घेतलाय.
मतदारसंघात महायुती आणि महाविकास आघाडीच्या राजकारणावर प्रभाव
२०१९ च्या लोकसभा निवडणुकीत वंचित बहुजन आघाडीचे उमेदवार डॉ. शरदचंद्र वानखेडे यांना तिसऱ्या क्रमांकावर ७७१५८ मतं मिळली होती. येणाऱ्या लोकसभा निवडणुकीसाठी वंचितकडून ओबीसी चेहरा म्हणून प्रभाकर बकले यांना उमेदवारी मिळाली आहे. बकले यांची उमेदवारी कोणाच्या पथ्यावर पडणार, कोणाला फटका बसणार याची चर्चा सुरु आहे.
मराठा आंदोलनाचा फायदा होणार?
मराठा आरक्षण आंदोलनाचा केंद्रबिंदू जालना बनलेला आहे. वंचित बहुजन आघाडीचे प्रमुख प्रकाश आंबेडकर यांनी मनोज जरांगे यांना पाठिंबा दिला होता. त्यामुळे मराठा आंदोलनाचा वंचित बहुजन आघाडीला फायदा होणार असल्याचं देखील बोललं जात आहे.
तिकीट कापल्याची नाराजी विसरले, मुरली अण्णांना पूर्ण ताकद, मुळीक म्हणाले-कमळ हाच उमेदवार!
जालना लोकसभा मतदारसंघाची सामाजिक स्थिती अंदाजे –
मराठा – ३६७४६० १९ टक्के
मुस्लिम- ३४८१२० १८ टक्के
ओबीसी – ५८०२०० ३० टक्के
बौद्ध – ३२८७८० १७ टक्के
इतर – ३०९४४० १६ टक्के
जालना लोकसभा मतदारसंघ भाजपचा गड मानला जातो. भाजपचे उमेदवार रावसाहेब दानवे हे सहाव्यांदा निवडणुकीच्या रिंगणात उतरले आहे. गेल्या पंचवीस वर्षापासून जालन्यात काँग्रेसचा उमेदवार दानवेंना पराभूत करू शकला नाही.तिकीट कापण्याची भीती, खासदार भावना गवळींचे समर्थक आक्रमक, पक्षाला थेट धमकी
महविकास आघाडीवर परिणाम?
महाविकास आघाडीकडून अद्याप उमेदवार कोण असणार हे निश्चित झालेलं नाही. दरम्यान या ठिकाणी मराठा किंवा ओबीसी उमेदवार दिल्यास वंचितचा प्रभाव त्यानुसार वेगवेगळा पडू शकतो. राज्यपातळीवर वंचितने महाविकास आघाडीपासून फारकत घेऊन आपले स्वतंत्र उमेदवार जाहीर केले आहे. त्यामुळे पारंपारिक मतदान विखुरणार आहे. याचा परिणाम जालना लोकसभेवर देखील पडू शकतो. वंचितचा परंपरागत मतदार आणि बकले ज्या जात प्रवर्गातून येतात त्यांचा मतदारसंघातील प्रभाव महाविकास आघाडीची डोकेदुखी वाढवू शकते.
महायुतीवर परिणाम?
राजकीय जाणकारांच्या मतानुसार भाजपचा परंपरागत ओबीसी मतदार वंचितच्या या उमेदवारामुळे विखुरण्याची शक्यता आहे. बकले हे ज्या जात प्रवर्गातून येतात त्या प्रवर्गाचा भाजपाला फायदा झाल्याचा इतिहास आहे. त्यामुळे हा मतदार भाजप पासून वेगळा झाल्यास याचा फटका देखील भाजपच्या उमेदवाराला पर्यायाने रावसाहेब दानवे यांना बसू शकतो.