चंद्रपूर: असं म्हणतात की, राजकारणात गरज पडली तर शत्रूलाही मित्र करावं लागतं. चंद्रपूर-वणी-आर्णी लोकसभा मतदारसंघाचे महायुतीचे उमेदवार सुधीर मुनगंटीवार यांनी मात्र कठोर भूमिका घेतली आहे. अपक्ष आमदार किशोर जोरगेवार यांच्याबाबत बोलताना मुनगंटीवार म्हणाले, जर तुमचा उजवा हात माझ्यावर घाणेरडी टीका करतोय, त्याची तुम्हाला माहिती नाही, असं तुम्ही म्हणत असाल तर ते योग्य नाही. जोपर्यंत त्यांच्या उजव्या हाताचे लिखाण थांबत नाही तोपर्यंत त्यांच्याशी संपर्क साधण्याचा प्रश्नच उद्भवत नाही. आमदार जोरगेवार विरोधात गेले तर मताचे विभाजन होऊ शकते. याची जाणीव असतानाही मुनगंटीवारांची भूमिका मात्र ‘झुकेगा नाही’ अशी आहे.
हक्काच्या कार्यकर्त्याची घरवापसी अजितदादांच्या जिव्हारी; नगरमध्ये नव्या शिलेदाराची विखेंना साथ
चंद्रपूर मतदारसंघात लोकसभा निवडणुकीचा अक्षरशः धुरळा उडला आहे. यात अपक्ष आमदार किशोर जोरगेवार मात्र कुठे दिसत नाही आहेत. ते घरी निवांत बसले आहेत. आपल्या आवडीचे पदार्थ ते बनवत आहेत. असे का ? असा प्रश्न माध्यमांनी केला. या प्रश्नावर आमदार जोरगेवार म्हणाले, महायुती समर्थक आमदार असलो तरी भाजप उमेदवार अथवा घटक पक्ष यापैकी कुणीही प्रचार अथवा मदतीसाठी बोलावले नाही. माझा कुठला मोठा पक्ष अथवा जातीय वोट बँक नसल्याने बेरजेच्या गणितात आपल्याला मोजले जात नसल्याचा तर्क त्यांनी बोलून दाखविला. मुनगंटीवार यांच्याकडून बोलावणं आल्याशिवाय प्रचाराच्या मैदानात आपण उतरणार नाही, असा आमदार जोरगेवारांचा बोलण्याचा अर्थ निघतोय.आमदार जोरगेवार यांनी केलेल्या वक्तव्यावर सुधीर मुनगंटीवार यांनी सडेतोड उत्तर दिले. मी संपर्क केला नाही. कारण त्यांचे अतिशय उजवे हात असणारे माझ्यावर अतिशय निम्मं शब्दात टीका करतात. मी काय समजायचे? पाठिंबा समजायचा की शिव्यांचे प्रेम समजायचे. माझ्यासाठी पद महत्वाचे नाही. तुम्ही खोटं नाटं लिहायचं आणि मी फक्त खुर्चीसाठी तुमच्यासोबत बसायचं. मला असं राजकारण नको. मला जनतेच्या हिताचे राजकारण करायचे आहे? अशा शब्दात मुनगंटीवार यांनी जोरगेवार यांचा समाचार घेतला.

मी कधीच सेटिंगचे राजकारण केलेले नाही. जय, पराजयाची मला चिंता नाही. जर जनतेला मी नकोय तर जनता मला नाकारेल. जोरगेवार यांनी कुणाला मदत करावी हा त्यांचा व्यक्तिगत प्रश्न आहे. मात्र जो पर्यंत त्यांचा उजव्या हाताचे लिखाण थांबत नाही तोपर्यंत त्यांचाशी संपर्क करण्याचा प्रश्नच उद्भभवत नाही, अशी टोकाची भूमिका मुनगंटीवार यांनी घेतली आहे. मी स्वाभिमानी आहे. खोटी टीका, निम्मं टीका मी सहन करणार नाही. हे मात्र खरे ते आता मदत करणार नाही. मी पुढे मदत करणार नाही, असा अप्रत्यक्ष इशारा मुनगंटीवार यांनी दिला आहे.