सासवड: अजित पवारांना प्रचंड गुर्मी आहे. बारामती मतदारसंघाचा सातबारा पवार कुटुंबाकडे आहे का? बारामतीमधून निवडणूक लढणार म्हणजे लढणारच अशी भाषा करणारे शिवसेनेचे नेते विजय शिवतारे आता बॅकफूटला आले आहेत. महायुतीची, मुख्यमंत्र्यांची अडचण होत असल्यानं बारामतीमधून लढणार नाही म्हणत शिवतारेंनी निवडणुकीच्या रिंगणातून माघार घेतली. पण त्यानंतर पत्रकारांच्या प्रश्नांना उत्तरं देताना त्यांची चांगलीच भंबेरी उडाली.

कोण सुनेत्रा पवार असा प्रश्न विचारणाऱ्या शिवतारेंनी आज बारामतीतून विजयी होतील सुनेत्रा वहिनी असं म्हणत तलवार म्यान केली. पवारांची गुर्मी ते महायुती म्हणून पवारांचा प्रचार असा प्रवास शिवतारेंनी अवघ्या तीन आठवड्यांमध्ये केला. बारामतीत पवार विरुद्ध पवार असा संघर्ष होतोय. त्यामुळे पवारविरोधी मतदारांनी काय करायचं? मतदारसंघात साडे पाच लाख मतदार पवारविरोधी आहेत. त्यांनी कोणाला मतदान करायचं? त्यांच्यासाठी, लोकशाहीसाठी मी निवडणूक लढवणार आहे, असं म्हणणारे पवार कुटुंबावर तोफ डागणाऱ्या शिवतारेंचा सूर आज अगदी नरमला होता.
शिव’तारे जमीन पर’; एक फोन अन् बापूंना साक्षात्कार; तो कॉल कोणाचा? शिवतारेंनी सगळंच सांगितलं
प्रश्नांची सरबत्ती, शिवतारेंची भंबेरी
गेल्या तीन आठवड्यांपासून तुम्ही लोकसभा निवडणूक लढवण्याची भाषा करत होतात. पवार कुटुंबावर टीका करत होतात. ही सगळी नुराकुस्ती होती का, असा सवाल विचारताच मी असले प्रकार करत नाही, असं उत्तर शिवतारेंनी दिली. मला एका अधिकाऱ्याचा फोन आला. तुम्ही घेतलेल्या भूमिकेमुळे मुख्यमंत्री अडचणीत आले आहेत. शिवतारे मुख्यमंत्र्यांचे ऐकत नाहीत असा मेसेज जात असल्यानं त्यांच्या अडचणी वाढल्या आहेत, असं त्यांनी मला सांगितलं. त्यामुळे मी माघार घेण्याचं ठरवलं, असं शिवतारे म्हणाले.
मी शरद पवार साहेबांचा ऋणी! जानकरांचं ‘मिशन परभणी’; अजित पवारांच्या वाढणार अडचणी?
मी स्वत:साठी काही मागितलेलं नाही. मी माझ्या मतदारसंघासाठी मागितलं. माझ्या मतदारसंघातील कामं मार्गी लागावीत अशा मागण्या मी केल्या. पाच वर्षे मी आमदार नसल्यानं मतदारसंघातील अनेक कामं थांबली आहेत. ती पूर्ण करण्याचा शब्द मुख्यमंत्री शिंदे, उपमुख्यमंत्री फडणवीस आणि अजित पवारांनी दिला. या तिन्ही नेत्यांशी चर्चा झाली. लवकरच तिन्ही नेते पालखीतळावर सभा घेतील आणि अडकलेल्या कामांबद्दल बोलतील, असं शिवतारेंनी सांगितलं.

बारामतीचा सातबारा पवार कुटुंबाच्या नावावर केलाय का, असा प्रश्न तुम्ही विचारला होता. आता सुनेत्रा पवारांची उमेदवारी मान्य करुन तुम्ही बारामतीचा सातबारा अजित पवारांच्या नावावर करणार आहात का, असा सवाल शिवतारेंना विचारण्यात आला. त्यावर तुम्ही चुकीचा प्रश्न विचारताय म्हणत शिवतारेंनी काढता पाय घेतला. स्वाभिमानाचा प्रश्न तु्म्ही उपस्थित केला होता याची आठवण पत्रकारानं करुन दिली. पण अडचणीत आलेल्या बापूंनी थेट कार गाठली आणि आत जाऊन बसले.