नाशिक : नाशिक लोकसभेसाठी शिवसेना ठाकरे गटाकडून उमेदवारी जाहीर झाल्यानंतर माजी आमदार राजाभाऊ वाजे यांनी गुरुवारी (दि. २८) मुंबईत ‘मातोश्री’वर जाऊन पक्षप्रमुख उद्धव ठाकरेंची भेट घेतली. यावेळी विजयाचे गणित मांडूनच वाजेंना उमेदवारी दिल्याचे सांगत नाशिकमध्ये विजय आपलाच होईल, माजी जिल्हाप्रमुख विजय करंजकरदेखील आपलेच असल्याचा विश्वासही ठाकरेंनी व्यक्त केला.

वाजे यांना विजयी होऊन ‘मातोश्री’वर पुन्हा येण्याचा आशीर्वाद देत ठाकरे यांनी दोन दिवसांत करंजकर भेटायला येणार असल्याचे सांगत पदाधिकाऱ्यांना आश्वस्त केले. नाशिक लोकसभा मतदारसंघात ठाकरे गटाचे उमेदवार कोण हा ‘सस्पेन्स’ अखेर बुधवारी संपला. सिन्नरचे माजी आमदार राजाभाऊ वाजेंची उमेदवारी जाहीर झाल्यामुळे माजी जिल्हाप्रमुख विजय करंजकर नाराज झाले असून, त्यांनी बंडाचा इशारा दिला आहे. या पार्श्वभूमीवर वाजेंनी उमेदवारी जाहीर झाल्यानंतर गुरुवारी ‘मातोश्री’वर जाऊन ठाकरेंचे आशीर्वाद घेतले.
नवा ‘कसबा पॅटर्न’ ठरतोय महाविकास आघाडीसाठी डोकेदुखी, ठाकरे गटाने धंगेकरांचं टेन्शन वाढवलं
यावेळी सहसंपर्कप्रमुख दत्ता गायकवाड, जिल्हाप्रमुख सुधाकर बडगुजर, महानगरप्रमुख विलास शिंदे, माजी आमदार वसंत गिते, जयंत दिंडे, विनायक पांडे, संजय चव्हाण यांच्यासह अन्य पदाधिकारी उपस्थित होते. वाजेंनाच उमेदवारी का दिली याचे गणित ठाकरेंनी पदाधिकाऱ्यांसमोर मांडले. प्रचारास जोमाने प्रारंभ करण्याचा, तसेच विजयी होण्याचा कानमंत्रही त्यांनी दिला. वाजेंनीही विश्वास सार्थ ठरविण्याची ग्वाही दिली.
राष्ट्रवादीच्या माजी खासदाराला ठाकरेंकडून उमेदवारी, पवार गटाच्या बैठकीत नेत्यांची नाराजी

‘करंजकरांना दिली होती संधी’

यावेळी उद्धव ठाकरेंसोबत पदाधिकाऱ्यांनी विजय करंजकर यांच्या नाराजीवरही चर्चा केली. त्यावेळी ठाकरेंनी विजय करंजकर आपलेच असून, ते आपल्यासोबत राहतील, असा विश्वास व्यक्त केला. सन २०१९ च्या निवडणुकीत करंजकर यांनी लढण्याची इच्छा व्यक्त केली होती. परंतु, गोडसेंना उमेदवारी दिल्यामुळे त्यांना थांबवले होते. त्यानंतर विधान परिषदेत राज्यपाल नियुक्त आमदारांमध्ये त्यांना संधी दिली होती. परंतु, तत्कालीन राज्यपाल भगतसिंह कोश्यारी यांनी नावेच जाहीर न केल्याने त्यांची आमदारकीची संधी हुकल्याचे ठाकरेंनी पदाधिकाऱ्यांना सांगितले. येत्या दोन दिवसांत करंजकर आपल्याला भेटायला येणार असल्याचे सांगत ठाकरेंनी पदाधिकाऱ्यांना आश्वस्त केले.
Read Latest Maharashtra News Updates And Marathi News

घाटनदेवीपासून शक्तिप्रदर्शन

वाजे यांनी उद्धव ठाकरेंचे आशीर्वाद घेतल्यानंतर नाशिककडे निघाल्यानंतर त्यांचा मतदारसंघात प्रवेश होताच शिवसैनिकांनी त्यांचे जल्लोषात स्वागत केले. घाटनदेवीचे दर्शन घेतल्यानंतर कार्यकर्त्यांनी रॅली काढून जोरदार घोषणाबाजी करीत शक्तिप्रदर्शन केले.