सोलापूर: माढा लोकसभा मतदारसंघाचा तिढा अजूनही कायम आहे. भाजपकडून रणजितसिंह नाईक निंबाळकर यांना उमेदवारी जाहीर होताच अकलूजमधील मोहिते पाटील परिवार आणि साताऱ्यामधील अजित पवार गट राष्ट्रवादीच्या नेत्यांनी जबरदस्त विरोध सुरू केला आहे. अनेक दिवसांपासून माढ्याचा तिढा कायम आहे.
भाजपचा मतदारसंघावर अतिक्रमण, महिनाभर प्लॅनिंग, निगेटिव्ह सर्वे पण वर्षावरील बैठकीने चित्र बदललं, दोन्ही उमेदवारांना तिकीट
गुरुवारी दुपारी रणजितसिंह मोहिते पाटील हे देवेंद्र फडणवीसांना भेटण्यासाठी सागर बंगल्यावर गेले आहेत. तर अजित पवारांची भेट घेण्यासाठी रामराजे निंबाळकर हे देवगिरी बंगल्यावर गेले आहेत. सागर आणि देवगिरी बंगल्यावर माढ्याचा तिढा सोडवण्यासाठी बैठकांवर बैठका होत आहेत. शरद पवार गटाचे खासदार डॉ. अमोल कोल्हे हे बुधवारी अकलूज येथे जाऊन मोहिते पाटील यांची भेट घेतल्यानंतर मोहिते पाटील तुतारी चिन्हावर लढतील, असा अंदाज वर्तवला होता. धैर्यशील मोहिते पाटील तुतारी हातात घेणार आहेत. त्यामुळे भाजप पुन्हा एकदा मास्टरस्ट्रोक मारण्याच्या तयारीत आहे.

माढ्यात कमळाला मोठा विरोधक येऊ नये, यासाठी भारतीय जनता पार्टी पूर्ण ताकदीने प्रयत्न करत आहे. रासपचे महादेव जानकर हे तुतारी घेऊन माढ्यात निवडणूक लढतील हे सर्व फिक्स असताना अचानकपणे महादेव जानकर यांनी महायुतीत प्रवेश करत शरद पवारांना धक्का दिला. आता अकलूजकर किंवा मोहिते पाटील देखील शरद पवारांना राजकीय धक्का देतील की काय अशी परिस्थिती निर्माण झाली आहे. माढ्याचा तोडगा अनेक दिवसांपासून निघत नाही आहे, त्यासाठी मोहिते पाटील परिवार शिवरत्न बंगल्यात बसून राजकीय गणित मांडत आहे.