जळगाव : लोकसभा निवडणुकीची घोषणा होण्यापूर्वीच भाजपाने खान्देशातील चारही मतदारसंघाच्या जागांवर आपल्या उमेदवारांची नावे जाहीर केलीत. भाजप उमेदवारांची घोषणा होवून १४ दिवस उलटले आहेत. खान्देशात नंदुरबार वगळता जळगाव, रावेर व धुळे मतदारसंघात महाविकास आघाडीचे उमेदवार अद्याप ठरलेले नाहीत. ’नवरदेव’ निश्चित होत नसतांनाच दररोज नवनवीन नावांची चर्चा होत असल्याने महाविकास आघाडीचे पदाधिकारी व कार्यकर्त्यांचे ‘वऱ्हाड’ ऐन निवडणुकीच्या तोंडावर सभ्रमात पडले आहे.खान्देशातील जळगाव मतदारसंघात भाजपाकडून स्मीता वाघ उमेदवार आहेत. रावेरला खासदार रक्षा खडसे, धुळ्यात डॉ. सुभाष भामरे व नंदुराबारला डॉ. हीना गावित यांना भाजपाने पुन्हा संधी दिली आहे. भाजपाचे उमेदवार जाहीर होवून आज १४ दिवस उलटले आहे. या उमेदवारांनी प्रचाराच्या दृष्टीने मतदारसंघात भेटीगाठींचा सपाटा लावला आहे. दुसरीकडे महाविकास आघाडीतर्फे नंदुरबार येथे काँग्रसने अॅड. गोवाल पाडवी यांना उमेदवारी देणयात आली आहे. मात्र, धुळ्यातून काँग्रेस, जळगावातून ठाकरे गट व रावेर मधून शरदचंद्र पवार गटाकडून अद्याप उमेवार निश्चित करण्यात आलेले नाहीत. विशेष म्हणजे तिनही मतदारसंघातून आघाडीतील पक्षांकडून दररोज नविन नविन इच्छुक उमेदवारांची नावे समोर येत असल्याने पदाधिकारी व कार्यकर्ते संभ्रमात पडले आहेत. आज याचे स्वागत करावे तर दुसऱ्याच दिवशी वेगळ्याच इच्छुकाचे नाव चर्चेत येत असल्याने स्थानिक नेत्यांची डोकदुखी वाढली आहे.
राष्ट्रवादीच्या माजी खासदाराला ठाकरेंकडून उमेदवारी, पवार गटाच्या बैठकीत नेत्यांची नाराजी

जळगावात ठाकरे गट आयात उमेदवार देणार?

जळगाव लोकसभेची जागा असलेल्या ठाकरे गटाने उमेदवार जाहीर केलेला नाही. भाजपातील एका प्रमुख पदाधिकाऱ्याला फोडण्याचा डाव असल्याने उमेदवार ऐनवेळी जाहीर भाजपाची नाकेबंदी करण्याचा डाव खेळला जात आहे. दरम्यान, भाजपाचे विद्यमान खासदार उन्मेश पाटील यांच्या पत्नी संपदा पाटील यांच्या नावाची देखील ठाकरे गटाकडून चाचपणी केली जात आहे. दुसरीकडे ठाकरे गटातील इच्छुक डॉ. हर्षल माने, कूलभूषण पाटील व अॅड. ललिता पाटील यांची नावे मागे पडली आहेत.

रावेरात पवार गटातून दररोज वेगळे नाव

शरदचंद्र पवार गटाकडून उमेदवार निश्चितीसाठी काल बुधवारी मुंबईला झालेल्या पक्षाच्या बैठकीत चार नावांवर चर्चा झाली. मात्र, उमेदवाराचे नाव अंतीम होऊ शकलेले नाही. ५ एप्रिल रोजी पक्षाकडून उमेदवाराचे नाव जाहीर केले जाणार असल्याची माहिती पक्षाचे जिल्हाध्यक्ष ॲड. रविंद्र पाटील यांनी दिली आहे. दरम्यान, संतोष चौधरी यांनी उमेदवारी निश्चित झाल्याचे सांगत प्रचाराला सुरुवात केली. त्यानंतर अॅड. रविंद्र पाटलांचे नाव समोर आले. त्यापाठोपाठ आता महिनाभरापुर्वी भाजपामध्ये प्रवेश केलेले उद्योजक श्रीराम पाटील यांचे नाव समोर आल्याने पदाधिकारी व कार्यकर्ते संभ्रमात पडले आहे.

धुळ्यातही उमेदवारीचा पेच कायम

भाजपाचे उमेदवार डॉ. भामरे यांच्या विरोधात तुल्यबळ असलेल्या उमेदवाराचा शोध काँग्रेकडून घेतला जात आहे. आमदार कुणाल पाटील यांनी उमेदवारीसाठी नकार दिल्याने आता काँग्रेसकडून तुषार शेवाळे, प्रशांत हिरे, धुळे काँग्रेस जिल्हाध्यक्ष शामकांत सनेर यांच्या नावांची चर्चा सुरु आहे. त्यात आणखी काही नविन नावांची भर पडत असल्याने तेथेही आघाडीचे कार्यकर्ते द्विधा मनस्थितीत आहेत.