नयन यादवाड, कोल्हापूर : एकनाथ शिंदे यांच्या शिवसेनेकडून विद्यमान खासदार धैर्यशील माने यांची उमेदवारी निश्चित झाल्यानंतर भाजपचे मित्रपक्ष असलेले ताराराणी आघाडीचे आमदार प्रकाश अण्णा आवाडे यांचे सुपुत्र राहुल आवाडे यांनी नाराज होऊन उद्धव ठाकरे यांच्या शिवसेनेची मशाल हाती घेण्याचा निर्णय घेतलाय. माजी खासदार राजू शेट्टी यांनी शिवसेनेत (ठाकरे गट) प्रवेश करण्यास नकार कळविल्यानंतर, बाहेरून पाठिंबा देण्याऐवजी मशाल चिन्हावर उमेदवार देण्याचा निर्णय उद्धव ठाकरेंनी घेतला. त्यामुळे आता हातकणंगले लोकसभा मतदारसंघात माने-शेट्टी-आवाडे अशी तिरंगी लढत होणार आहे.इचलकरंजीचे आमदार प्रकाश अण्णा आवाडे यांचे सुपुत्र राहुल आवाडे यांनी उद्धव ठाकरे यांच्या शिवसेनेकडून लढण्याचा निर्णय घेतला आहे. कार्यकर्त्यांच्या बैठकीत हा निर्णय झाल्याची माहिती आहे. कोल्हापूरचे शिवसेना संपर्क नेते संजय पवार यांच्याशी त्यांची भेट झाली. त्या भेटीत निवडणूक लढण्यावर शिक्कामोर्तब झाले. उद्धव ठाकरे यांना लवकरच आवडे भेटणार आहेत.
राजकारण: शेट्टींची ठाकरेंशी गट्टी? हातकणंगलेत भाजपमुळे सेनेची कोंडी; खासदार मानेंची गोची

आवाडे यांचा ताराराणी पक्ष हा भाजपचा मित्रपक्ष आहे. गेल्या अनेक वर्षांपासून ते भाजपला बाहेरून पाठिंबा देतात. परंतु यंदाच्या लोकसभा उमेदवारीच्या चर्चेत विचारात घेतलं नाही किंबहुना सहभागी करून घेतलं नाही, अशी तीव्र नाराज व्यक्त करून स्वतंत्र निर्णय घेतल्याचे आवाडे यांनी सांगितले. तर दुसऱ्या बाजूला ठाकरे गटाला देखील ताकदवान उमेदवार नसल्याने राहुल आवाडे यांच्या रूपाने ठाकरेंना मोठी ताकद या मतदारसंघात मिळू शकते. मात्र राहुल आवाडे निवडणूक रिंगणात उतरले तर राजू शेट्टी आणि त्या धैर्यशील माने यांची मात्र डोकेदुखी वाढणार आहे.
सांगलीचा निकाल लागला, हातकणंगलेत उद्धव ठाकरे काय भूमिका घेणार? राजू शेट्टींची धाकधूक वाढली.

हातकणंगले मतदारसंघात आवाडे यांची मोठी ताकद आहे. तसेच महाविकास आघाडीचेही तीन आमदार हातकणंगले मतदारसंघात आहेत.इस्लामपूर, शिराळा तसेच हातकणंगलेमधून आवाडे यांच्यामागे ताकद उभी राहिल.

तिरंगी लढत, कोण कुणाचा गेम करणार?

२०१९ च्या लोकसभा निवडणुकीत स्वाभिमानी शेतकरी संघटना काँग्रेस राष्ट्रवादी आघाडीसोबत होती. तेव्हा राजू शेट्टी यांची हॅट्‌ट्रिक वंचित बहुजन आघाडीच्या उमेदवारामुळे हुकली. वंचितच्या मतविभागणीमुळे धैर्यशील माने खासदार झाले. आताही आवाडे यांच्या उमेदवारीमुळे तीच वेळ येणार की आवाडेंमुळे मानेंना फटका बसून शेट्टी खासदार होणार? याकडे हातकणंगलेसह संपूर्ण महाराष्ट्राचे लक्ष लागलेय.

हातकणंगले लोकसभा मतदारसंघाची रचना कशी?

कोल्हापूर जिल्हा

शाहूवाडी विधानसभा मतदारसंघ (विनय कोरे-जनसुराज्य)
हातकणंगले विधानसभा मतदारसंघ (राजू आवळे- काँग्रेस)
इचलकरंजी विधानसभा मतदारसंघ (प्रकाश आवाडे- ताराराणी)
शिरोळ विधानसभा मतदारसंघ (राजेंद्र पाटील यड्रावकर अपक्ष आमदार, शिंदे गटाला पाठिंबा)

सांगली जिल्हा
इस्लामपूर विधानसभा मतदारसंघ (जयंत पाटील, राष्ट्रवादी)
शिराळा विधानसभा मतदारसंघ (मानसिंगराव नाईक, राष्ट्रवादी)