मुंबई : लोकसभा निवडणुकीसाठी महायुतीमध्ये जागा वाटपाचा तिढा अजून कायम आहे. त्यातच महायुतीतील जाहीर केलेल्या उमेदवारांना स्थानिक पातळीवर मोठ्या प्रमाणावर विरोध असल्याचे समोर आले आहे. त्यामुळं नाराजांची नाराजी दूर करण्यासाठी उपमुख्यमंत्री देवेंद्र फडणवीस यांच्या निवासस्थानी खलबतं सुरू असल्याचे पाहायला मिळत आहे.भाजपने राज्यातील ४८ पैकी २३ जागांवर उमेदवार जाहीर केले आहेत. त्यातच अहमदनगर दक्षिण या मतदारसंघात डॉ. सुजय विखे पाटील यांना भाजपने पुन्हा संधी दिली आहे. मात्र डॉ. सुजय विखे पाटील यांच्या उमेदवारीला भाजप नेते राम शिंदे यांच्यासह जिल्ह्यातील भाजप पदाधिकाऱ्यांनी विरोध दर्शवला होता. तर पाच वर्षात झालेल्या चुकांबद्दल सुजय विखे यांनी भाजप पदाधिकाऱ्यांची माफी मागितली होती. त्यानंतरही आमदार राम शिंदे यांनी नाराजी दर्शवली होती. तसेच २०१९ मध्ये विधानसभा निवडणुकीत पराभवासाठी विखे पाटील हे जबाबदार असल्याची तक्रार केली होती. त्यानंतरही अनेकदा राम शिंदे यांनी विखे पाटील यांच्या कार्यपद्धतीवर टीका केली होती. त्यामुळे राम शिंदे यांची नाराजी दूर करण्यासाठी उपमुख्यमंत्री देवेंद्र फडणवीस यांच्या सागर या निवासस्थानी मंत्री राधाकृष्ण विखे आणि सुजय विखे धाव घेतली. यावेळी देवेंद्र फडणवीस यांनी बोलावलेल्या बैठकीत राम शिंदे यांची नाराजी दूर करण्यात येण्याची शक्यता आहे.
दुसरीकडे बारामती मतदारसंघात अजित पवार यांच्या पत्नी सुनेत्रा पवार या सुप्रिया सुळे यांच्या विरोधात मैदानात उतरल्या आहेत. सुनेत्रा पवार यांनी मतदारसंघ पिंजून काढत जनसंपर्क वाढवला आहे. मात्र एका बाजूला जोरदार प्रचार सुरू असताना सुनेत्रा पवार यांच्या नावाला महायुतीतील हर्षवर्धन पाटील आणि विजय शिवतारे यांनी विरोध दर्शवला आहे.
दुसरीकडे बारामती मतदारसंघात अजित पवार यांच्या पत्नी सुनेत्रा पवार या सुप्रिया सुळे यांच्या विरोधात मैदानात उतरल्या आहेत. सुनेत्रा पवार यांनी मतदारसंघ पिंजून काढत जनसंपर्क वाढवला आहे. मात्र एका बाजूला जोरदार प्रचार सुरू असताना सुनेत्रा पवार यांच्या नावाला महायुतीतील हर्षवर्धन पाटील आणि विजय शिवतारे यांनी विरोध दर्शवला आहे.
२०१९ च्या विधानसभा निवडणुकीत अजित पवार यांनी केलेल्या अपमानाचा बदला घेण्यासाठी विजय शिवतारे यांनी दंड थोपटले आहेत. त्यातच मुख्यमंत्री एकनाथ शिंदे यांनी विजय शिवतरे यांची समजूत घातल्यानंतरही शिवतारे बारामती लोकसभा निवडणूक लढवण्यावर ठाम आहेत. एका बाजूला शिवतारे यांचा विरोध असतानाच दुसऱ्या बाजूला माजी मंत्री हर्षवर्धन पाटील यांनी अजित पवार यांच्यावर तोफ डागली आहे.
पाच सभांमधून मला धमकावलं जात असल्याचा आरोप करताना हर्षवर्धन पाटील यांनी अजित पवार यांच्याकडे अंगुलीनिर्देश केला होता. त्यावेळी हर्षवर्धन पाटील यांनी देवेंद्र फडणवीस यांची भेट घेतली होती. मात्र बारामती लोकसभेबाबत हर्षवर्धन पाटील यांची नाराजी दूर करण्यात फडणवीस यांना अपयश आलं होतं. त्यामुळं पुन्हा एकदा सुनेत्रा पवार यांना मदत करण्यासंदर्भात आणि महायुतीचा धर्म पाळण्यासंदर्भात देवेंद्र फडणवीस यांच्याकडून हर्षवर्धन पाटील यांची मनधरणी करण्यात येत आहे. त्यामुळे नाराजांची नाराजी दूर करण्यात देवेंद्र फडणवीस यांना यश येईल का? ते पाहणे महत्त्वाचं ठरणार आहे.