म. टा. विशेष प्रतिनिधी, नाशिक : वाहकांनी पुकारलेल्या संपामुळे गेले नऊ दिवस ठप्प झालेली सिटीलिंकची शहर बससेवा शनिवारी (दि. २३) दहाव्या दिवशी पूर्ववत झाली. नाशिकरोड आणि तपोवन डेपोतील २४६ बसेसच्या माध्यमातून शनिवारी २५४० बसफेऱ्या पूर्ववत सुरू झाल्याने प्रवाशांना दिलासा मिळाला. या संपामुळे पासधारकांचे झालेले नुकसान भरून काढण्यासाठी त्यांना नऊ दिवसांची मुदतवाढ देण्याचा निर्णय सिटीलिंक प्रशासनाने घेतल्याची माहिती व्यवस्थापक (संचलन) मिलिंद बंड यांनी दिली.
वाहक आणि ठेकेदाराच्या वादामुळे सिटीलिंक बससेवेला वारंवार संपाचा सामना करावा लागत आहे. गेल्या महिन्यात दोन दिवस संप झाला होता. त्यानंतर मार्चमध्येही तब्बल नऊ दिवस संप चालला. सिटीलिंककडून वेतनापोटी आगाऊ रक्कम स्वीकारूनही पुरवठादाराने वाहकांचे वेतन थकविल्याने तसेच पीएफ व ईएसआयसीची रक्कमही न भरल्याने वाहकांनी १४ मार्चपासून संप पुकारला होता. यामुळे तपोवन बस डेपोतील सर्वच १५० बसेस, तर नाशिकरोड डेपोतील ६० बसेसची सेवा पूर्णपणे थांबली होती. तब्बल नऊ दिवस चाललेल्या या संपामुळे चाकरमाने, प्रवासी तसेच विद्यार्थ्यांचे मोठे नुकसान झाले. संपकाळात रिक्षा तसेच खासगी प्रवासी वाहनांनी दुपटीने भाडे आकारल्याने सर्वसामान्यांना आर्थिक झळ सोसावी लागली. सिटीलिंकने ‘ग्रॉस टू कॉन्ट्रॅक्ट’ तत्त्वावर ही बससेवा सुरू केली असल्यामुळे संपात बसेस डेपोतच उभ्या राहिल्या. मात्र, तरी बस ऑपरेटर्सना प्रतिबस ४ हजार रुपये प्रतिदिन या दरानुसार सिटीलिंकला पैसे मोजावेच लागले. त्यामुळे सिटीलिंकचेही या संपामुळे मोठे नुकसान झाले. ठेकेदाराची जबाबदारी असूनही सिटीलिंकने वाहकांच्या वेतनापोटी ६५ लाख रुपये, तर पीएफपोटी एक कोटी रुपये जमा केले. त्यानंतर शुक्रवारी या संपावर कसाबसा तोडगा निघू शकला. त्यामुळे नाशिकरोड डेपोतून शुक्रवारी सायंकाळपासूनच बससेवा पूर्ववत सुरू झाली. या डेपोतून ९८ बसेस पूर्ववत धावायला सुरुवात झाली. तपोवन डेपोतील बससेवा शनिवारी सकाळपासून सुरू झाली. तपोवन डेपोतून १४८ बसेस सुरू झाल्या. या २४६ बसेसच्या माध्यमातून शनिवारी २५४० बसफेऱ्या पूर्ववत सुरू झाल्याने दिलासा मिळाला आहे.
पासधारकांना मुदतवाढ
संपकाळात बससेवा बंद राहिल्याने पासधारकांचे झालेले नुकसान भरून काढण्यासाठी मुदतवाढ देण्याची मागणी भाजप, मनसे तसेच ग्राहक पंचायतीकडून करण्यात आली होती. त्या मागणीची दखल घेत पासधारकांना पुढील नऊ दिवसांची मुदतवाढ देण्याचा निर्णय सिटीलिंक प्रशासनाने घेतला आहे. पासधारकांना पुढील नऊ दिवस संबंधित पास वापरता येणार असल्याचे सिटीलिंकने स्पष्ट केले आहे.