ठाणे: कल्याण लोकसभा निवडणुकीसाठी भाजपने डोंबिवली, उल्हासनगर, अंबरनाथ येथे महायुतीचे मेळावे घेतले. हिललाईन पोलीस स्टेशन मधील गोळीबार प्रकणानंतर भाजप पदाधिकारी यांनी बैठक घेत शिवसेना नेत्याचे फोटो लावणार नाहीत, अशी थेट भूमिका घेतली. दरम्यान, कल्याण पूर्वेतील भाजप पदाधिकारी, कार्यकर्त्यांची भूमिका जोपर्यंत स्पष्ट होत नाही, तोपर्यंत हा विधानसभा मतदारसंघ अवघड जागेचे दुखणे ठरणार आहे. या लोकसभेच्या निवडणुकीत कल्याण पूर्व हा मतदार संघ किंगमेकर ठरू शकतो असे जाणकाराचे मतं आहे.कल्याण पूर्वेतील तीव्र शिवसेना आणि भाजप पदाधिकारी यातील मतभेदांचा पेच कसा सोडवायचा हा महायुतीपुढील प्रश्न आहे. महेश गायकवाड आणि आमदार गणपत गायकवाड यांच्यात जमिनीवरून वाद सुरू होता. आमदार गायकवाड व त्यांच्या मुलावर अॅट्रॉसिटीखाली गुन्हे दाखल करण्यात येत होते. त्यातूनच वाद होऊन त्यांनी महेश गायकवाड यांच्यावर उल्हासनगरच्या हिललाईन पोलीस ठाण्यात गोळीबार केला होता. आमदार गणपत गायकवाड सध्या तुरुंगात आहेत. मात्र, त्यांची पत्नी सुलभा गणपत गायकवाड या भाजपच्या वतीने मतदारसंघात सक्रिय झाल्या आहेत.
तीन वेळ खासदार आढळरावांचा शिवसेनेला जय महाराष्ट्र, राष्ट्रवादी प्रवेशाचा मुहूर्त ठरला

गणपत गायकवाड तुरुंगात गेल्यामुळे शिवसेनेला तेथे मैदान मोकळे मिळू नये यासाठी भाजपने त्यांच्या पत्नीला राजकारणात सक्रिय केले. महायुतीचे डोंबिवली, उल्हासनगर, अंबरनाथमध्ये मेळावे झाले. मात्र, कल्याण पूर्वेत गणपत गायकवाड यांना डावलून मेळावा घेणे शक्य नाही. गणपत गायकवाड हे दोन वेळा अपक्ष आणि मागील निवडणुकीत भाजपच्या चिन्हावर निवडणूक जिंकले आहेत. गोळीबाराच्या घटनेनंतरही भाजपने अप्रत्यक्षपणे गणपत गायकवाड यांची पाठराखण केली. कल्याण पूर्वेतील मतभेद विधानसभा निवडणुकीच्यावेळी अधिक तीव्रतेने उफाळून येण्याची भीती आहे. निवडणुकीच्या तोंडावर आमदार गणपत गायकवाड यांना जामीन मिळाला तर येथील वातावरण तापण्याची शक्यता आहे.

मंत्री रविंद्र चव्हाण यांनी डोंबिवलीसारखी बैठक उल्हासनगर आणि अंबरनाथमध्ये सुद्धा घेतली. मात्र कल्याण पूर्व मतदार संघात अशी बैठक झाली नाही, त्यामुळे भाजप आमदार गणपत गायकवाड यांचे समर्थक आणि कल्याण पूर्वेतील भाजप पदाधिकारी खासदार श्रीकांत शिंदे यांना मदत करत नसल्याचे स्पष्ट होत आहे. कल्याण पूर्वेत भाजप आमदार गायकवाड यांच्या बॅनरवर शिंदे फोटो लावत नसल्याचे वारंवार समोर आले आहे. भाजप आमदार गायकवाड यांच्या पत्नी या कल्याण पूर्व मतदार संघात अॅक्टिव्ह झाल्या आहेत. त्यामुळे खासदार श्रीकांत शिंदेपुढे हेही आव्हान असू शकते. तर दुसरीकडे महायुतीमधील अजित पवार यांच्या राष्ट्रवादीला ज्या प्रकारे स्थान दिले पाहिजे तसे दिले जात नाहीय. राष्ट्रवादी प्रवक्ते आनंद परांजपे यांच्या बोलण्यावरुन हे सिद्ध झाले आहे.

दरम्यान, राज ठाकरे यांना मानणारा मोठा वर्ग कल्याण लोकसभेत आहे. तर मनसे एकमेव आमदार राजू पाटील लोकसभेतील कल्याण ग्रामीण मतदार संघातून निवडून आले आहेत. या सर्व घडामोडी पाहता शिंदे यांना मनसेला जवळ करावे लागणार आहे. याच घडामोडींवरुन मनसे आमदार पाटील यांनी एक सल्ला देत सांगितले की, ”कोणी कितीही आटापीटा केला तरी, यावेळी कल्याण लोकसभेतील उमेदवार यांनी यावेळी या मतदारसंघात मोठ्या मताधिक्याची भाषा कोणत्याही उमेदवाराने करू नये. या मतदारसंघातील उमेदवार हा काठावरच पास होणार आहे. तर निवडून यायचं असेल तर त्यांनी सावरून घ्यायला पाहिजे”, असा सल्ला राजू पाटील नाव न घेता खासदार श्रीकांत शिंदे यांना दिला आहे.