म. टा. प्रतिनिधी, छत्रपती संभाजीनगर : कोणतेही काम छोटे नसते. प्रामाणिकपणे केलेल्या कामाला प्रतिष्ठा मिळते, ते काम छोटे असले तरी त्याची उंची वाढते. याचे उदाहरण पालिकेने स्थापन केलेल्या ‘स्वच्छतारत्न’ बचतगटाचे आहे. या बचतगटाने स्वच्छतेचे काम सचोटीने केले, या कामातून उत्पन्नदेखील वाढवले आणि विश्वास देखील कमावला. याची दखल थेट ‘बिग बी’ अमिताभ बच्चन यांनी घेतली आणि या बचतगटाला दहा स्वच्छता यंत्र भेट म्हणून दिली व त्यांच्या कामाचा गौरव केला.
सफाई कामगार हा घटक तसा दुर्लक्षित आणि समाजाने लांब ठेवलेला असा घटक आहे. मुळातच पगार कमी आणि प्रतिष्ठादेखील कमी अशी या कामगारांची स्थिती असते. या कामगारांना प्रतिष्ठा मिळून देण्याच्या उद्देशाने महापालिकेने २०१५ साली शहराच्या छोटा मुरलीधरनगर परिसरातील पुरुष सफाई कामगारांना एकत्र आणले आणि त्यांचा ‘स्वच्छतारत्न बचतगट ’ स्थापन केला. बचतगटाचे अध्यक्ष म्हणून सुनील कपुरसिंग सिरसवाल यांची निवड करण्यात आली, तर सचिव म्हणून गुलाबसिंग हुकूमसिंग तुसामड यांची निवड करण्यात आली. या बचत गटाला चिकलठाणा येथील ‘सेंट्रल बँक ऑफ इंडिया’च्या शाखेत खाते उघडण्यासाठी मान्यता मिळाली व बचतगटाने या बँकेत संयुक्त खाते उघडले. २० ऑगस्ट २०२१ रोजी बँकेने बचतगटाला दहा हजारांचे खेळते भांडवल दिले, सोबतच दहा लाख रुपयांचे कर्जदेखील दिले.
बँकेने दिलेल्या कर्जातून बचत गटाने साफसफाईच्या कामासाठीची वाहने व यंत्रसामुग्री खरेदी केली. या कामगारांचे घर आतापर्यंत नालेसफाईच्या कामावर चालायचे. त्यातून तुटपुंजे पैसे मिळायचे. वाहने आणि यंत्रसामुग्री खरेदी केल्यामुळे बचत गटाला महापालिकेतील अधिकाऱ्यांच्या मदतीने चाळीस ते पन्नास सोसायटींमधील साफसफाईचे काम मिळाले. त्यामुळे त्यांचे उत्पन्न वाढले, राहणीमानात सुधारणा झाली. समाजात मानसन्मान मिळू लागला. बँकेच्या कर्जाची परतफेड नियमित सुरु असल्यामुळे बँकेच्या दृष्टीने देखील बचत गटाला प्रतिष्ठेचे स्थान मिळाले.
आत्मनिर्भरतेचा प्रवास
सफाई कामगारांच्या स्वच्छतारत्न बचत गटाच्या कामाची दखल ‘बिग बी’ अमिताभ बच्चन यांनी घेतली. त्यांच्या हस्ते बचत गटाच्या पदाधिकाऱ्यांना गौरविण्यात आले. बच्चन यांनी बचत गटाला दहा स्वच्छतायंत्र वाहनासह भेट म्हणून दिले आणि कामासाठी शुभेच्छा दिल्या. पालिकेचे प्रशासक जी. श्रीकांत, उपायुक्त अंकुश पांढरे यांच्या मार्गदर्शनाखाली बचत गट आत्मनिर्भर होत असल्याचे चित्र यातून पुढे आले आहे.