मुंबई : प्रख्यात अभिनेते गोविंदा राजकारणात आपली दुसरी इनिंग सुरु करण्याच्या तयारीत दिसत आहेत. काँग्रेसच्या तिकिटावर खासदारकी भूषवणारे गोविंदा दुसऱ्या सिझनमध्ये मुख्यमंत्री एकनाथ शिंदे यांच्या शिवसेनेत प्रवेश करण्याची शक्यता वर्तवली जात आहे. उत्तर पश्चिम (वायव्य) लोकसभा मतदारसंघातून गोविंदा निवडणुकीच्या रिंगणात उतरण्याची शक्यता आहे.
अभिनेते गोविंदा यांना धनुष्यबाण चिन्हावर उत्तर पश्चिम लोकसभा मतदारसंघातून निवडणुकीला उतरवण्याबाबत चाचपणी सुरु आहे. उत्तर पश्चिम ही जागा महायुतीत भाजपला सोडल्याची चर्चा होती. परंतु आता शिंदे गट या जागेवरुन उमेदवार उतरवण्याच्या हालचाली दिसत आहेत. काही काळापूर्वी मुख्यमंत्री एकनाथ शिंदे यांची गोविंदा यांनी भेट घेतल्याची माहिती आहे.
उत्तर पश्चिम लोकसभा मतदारसंघातून गजानन कीर्तिकर हे विद्यमान खासदार आहेत. कीर्तिकर हे लोकसभा उमेदवारीबाबत सुरुवातीला आक्रमक पाहायला मिळाले. परंतु ठाकरे गटाकडून याच मतदारसंघात त्यांचे सुपुत्र अमोल कीर्तिकर यांना तिकीट जाहीर करण्यात आलं. त्यानंतर गजानन कीर्तिकर काहीसे नरमल्याचे चित्र आहे. लेकाविरोधात निवडणूक न लढवण्याचा निर्णय घेत ते बॅकफूटवर गेले. त्यानंतर ही जागा भाजपला गेल्याची चर्चा होती.
काँग्रेसच्या तिकिटावर खासदार
२००४ मध्ये काँग्रेसच्या तिकिटावर लोकसभेच्या रिंगणात उतरलेले अभिनेते गोविंदा यांनी केंद्रीय मंत्रिपद भूषवलेल्या राम नाईक यांचा पाच टर्म राखलेला गड खालसा केला होता. जवळपास ५० हजारांचं मताधिक्य मिळवत गोविंदा यांनी राम नाईक यांचा पराभव केला होता. नाईकांना ५ लाख ११ हजार ४९२, तर गोविंदा यांना ५ लाख ५९ हजार ७६३ मतं मिळाली होती.
उद्धव ठाकरेंना धक्का, माजी आमदाराने साथ सोडली, शिंदेंच्या शिवसेनेतून थेट लोकसभेचं तिकीट?
संसदेतील अनुपस्थिती
खासदारपदी असताना गोविंदा यांच्याशी संपर्क होत नसल्याचं मतदारसंघातील जनतेचं म्हणणं होतं. संसदेतही त्यांची अनुपस्थिती चर्चेचा विषय ठरली होती. त्याच काळात गोविंदांनी बॉलिवूडमध्ये पुनरागमन केलं. २००७ मध्ये त्यांचा पार्टनर चित्रपट रिलीज झाला. वर्षभरात गोविंदा यांनी राजकारणाला रामराम ठोकण्याचा निर्णय घेतला. राजकारणात येऊन आपण वेळेचा अपव्यय केला आणि त्याचा फटका आपल्या चित्रपट कारकीर्दीला बसल्याचं वक्तव्यही त्यांनी त्यावेळी केलं होतं. मात्र आता गोविंदा राजकीय क्षेत्रात पुनरागमन करणार असल्याच्या चर्चा आहेत.
Read Latest Maharashtra News Updates And Marathi News
गोविंदा यांचं फिल्मी करिअर
६० वर्षीय गोविंदा यांनी वयाच्या २३ व्या वर्षी लव्ह ८६ चित्रपटातून बॉलिवूडमध्ये पदार्पण केलं होतं. सुरुवातील अॅक्शन, रोमँटिक, ड्रामा अशा विविधांगी भूमिका करणाऱ्या गोविंदा यांनी ९० च्या दशकात मात्र कॉमेडी भूमिका आत्मसात केल्या. त्यांची अनोखी डान्सिंग स्टाईल विशेष लक्षणीय ठरली. राजा बाबू, कुली नंबर वन, हिरो नंबर वन, दिवाना मस्ताना, दुल्हे राजा, बडे मिया छोटे मिया यासारख्या चित्रपटातील त्यांच्या भूमिका ‘नंबर वन’ ठरल्या. नंतरच्या काळात मात्र त्यांच्या करिअरला उतरती कळा लागली. पार्टनर, भागमभाग यासारखे मोजके अपवाद वगळता त्यांचे फारसे चित्रपट बॉक्स ऑफिसवर चालले नाहीत. नंतर ते काही डान्स रिअॅलिटी शोचे परीक्षण करताना दिसले.