भाजपाच्या जिल्हा बैठकीनंतर काल मंगळवारी रात्री भाजपाच्या नूतन कार्यालयात महायुतीतील जिल्ह्यातील प्रमुख नेते व पदाधिकाऱ्यांची बैठक झाली. या बैठकीला मंत्री गिरीश महाजन, खासदार रक्षा खडसे, आमदार किशोर पाटील, सुरेश भोळे, चंद्रकांत पाटील, मंगेश चव्हाण, भाजपा जिल्हाध्यक्ष अमोल जावळे, महानगराध्यक्षा उज्ज्वला बेंडाळे, राष्ट्रवादी अजित पवार गटाचे जिल्हाध्यक्ष संजय पवार, महानगराध्यक्ष अभिषेक पाटील, स्मिता वाघ यांच्यासह पदाधिकारी उपस्थित होते. बैठकीला पालकमंत्री गुलाबराव पाटील व शिंदे सेनेचे जिल्हाध्यक्ष निलेश पाटील अनुपस्थित होते.
चंद्रकांत पाटलांचा रक्षा खडसेंवर रोष
या बैठकीत शिंदे गटाचे मुक्ताईनगरचे आमदार चंद्रकांत पाटील यांनी रक्षा खडसे यांच्या उमेदवारीवरुन नाराजी व्यक्त करतानाच रक्षा खडसेंना युती म्हणून मदत केल्यानंतर त्या निवडून आल्यावर त्यांच्याकडून राष्ट्रवादीचे कार्यकर्ते मोठे केले जातात. खासदार निधीची कामेही राष्ट्रवादीच्या कार्यकर्त्यांना दिली जात असल्याचा आरोप केला जातो. खडसेंकडून होणाऱ्या टीकेला रक्षा खडसे का उत्तर देत नाहीत असा सवालही त्यांनी केला. भाजपा उमेदवार म्हणून आम्ही त्यांच्यासाठी काम करु, पण विधानसभेच्या वेळेस आम्हाला भाजपाकडून मदत होईल याची ‘गॅरंटी’ काय? सवाल आमदार पाटील यांनी केला.
किशोर पाटलांनीही मागितली मदतीची हमी
पाचोऱ्याचे शिंदे गटाचे आमदार किशोर पाटील यांनीही भाजपाच्या उमेदवार स्मिता वाघ यांच्यासाठी शिवसेना मदत करेलच, पण तसेच सहकार्य पाचोरा व भडगाव येथील तालुकाप्रमुख माझ्यासाठी विधानसभेला करतील का? याचे उत्तर मागितले.