बीड : बीडमधून अजित पवारांना मोठा धक्का बसला आहे. बजरंग सोनवणे यांनी अजितदादांच्या नेतृत्वातील राष्ट्रवादी काँग्रेस पक्षाचा राजीनामा दिला आहे. राष्ट्रीय अध्यक्ष सुनील तटकरे यांना पत्र लिहून सोनवणेंनी पक्षाला रामराम ठोकला आहे. सोनवणे लवकर राष्ट्रवादी काँग्रेस : शरदचंद्र पवार पक्षात प्रवेश करणार आहेत. निलेश लंकेंपाठोपाठ अजितदादांसाठी हा दुसरा हादरा मानला जात आहे.
बीड लोकसभा मतदारसंघातून निवडणूक लढवण्यास इच्छुक असणाऱ्या बजरंग सोनवणे यांनी उपमुख्यमंत्री अजित पवार यांची साथ सोडत ज्येष्ठ नेते शरद पवार यांच्या गटात प्रवेश करण्याचा निर्णय घेतला आहे. सोनवणे हे शरद पवार गटात गेल्यास भाजप उमेदवार पंकजा मुंडे यांची डोकेदुखी वाढणार आहे. पक्षातील फुटीनंतर सोनवणे अजितदादांबरोबर होते, मात्र त्यांनी आता शरद पवारांकडे घरवापसी करण्याचा निर्णय घेतला आहे.
बजरंग सोनवणे यांनी भाजप उमेदवार पंकजा मुंडे यांच्या विरोधात लोकसभा निवडणूक लढवावी, असा त्यांच्या कार्यकर्त्यांचा आग्रह होता. महायुतीत बीडची जागा भाजपकडे आहे. भाजपने विद्यमान खासदार प्रीतम मुंडे यांचं तिकीट कापत त्यांच्या भगिनी आणि माजी मंत्री पंकजा मुंडे यांना उमेदवारी जाहीर केली आहे.
Read Latest Maharashtra News Updates And Marathi News
२०१९ च्या लोकसभा निवडणुकीत बजरंग सोनवणे यांनी प्रीतम मुंडे यांच्याविरोधात रिंगणात उडी घेतली होती. राष्ट्रवादीच्या तिकिटावर त्यांनी निवडणूक लढवली होती. प्रीतम मुंडेंना ६ लाख ७८ हजार १७५ मतं मिळाली होती. तर सोनवणेंना ५ लाख ९ हजार ८०७ मतं पडली होती. म्हणजेच बीडमध्ये कोणे एके काळी विक्रमी मतांनी विजयी झालेल्या मुंडेंना १ लाख ७० हजारांचीच लीड मिळाली होती. त्यामुळे सोनवणेंचं बळ शरद पवार गटाला लाभल्यास पंकजांवर टांगती तलवार राहणार आहे.
बीड जिल्ह्यातील मातब्बर नेत्यांपैकी बजरंग सोनवणे हे देखील एक आहेत. आत्तापर्यंत एकनिष्ठ राहत अनेक वेळा पक्षाने दिलेल्या जबाबदाऱ्या ते पार पाडत गेले मात्र बीड जिल्ह्यातही स्वतःचं एक वेगळं वलय तयार करून ठेवलं. येडेश्वरी उद्योग समूहाचे ते अध्यक्ष आहेत. मागील लोकसभेत त्यांनी प्रीतम मुंडेंना देखील तगडी लढत दिली होती मात्र पक्षातील फूट आणि यामध्येही अजित पवारांशी ते संलग्न राहिले. त्यांना जिल्हाध्यक्ष पदाचा देखील राजीनामा द्यावा लागला मात्र त्यावरही त्यांनी समाधान मानत काम करत राहिले, ती खदखदही त्यांच्या मनी होती.
राज ठाकरे दिल्लीत अमित शाहांच्या घरी, ४० मिनिटं बैठक, अमित ठाकरेंच्या ‘फ्रंट सीट’ची चर्चा
अजित पवार गटात आल्यानंतर अनेक वेळा कार्यकर्त्यांवर नेहमीच अन्याय होत असल्याने यातच पक्षाने बजरंग सोनवणेंना अनेक वेळा धक्का दिला मात्र एका नंतर एक धक्के मिळत असल्याने आणि त्यात बीड जिल्ह्यात धनंजय मुंडे यांचे वर्चस्व वाढत चालल्याने कुठेतरी आपण बॅकफुटला जात असल्याची एक मोठी खदखद सोनवणे यांच्या मनात असल्याची चर्चा होत होती, मात्र अखेर आता लोकसभेच्या तोंडावरच अजित पवार यांना सोडचिठ्ठी देत आज शरद पवार गटाची वाट धरली आहे.