दीपक पडकर, बारामती : महायुतीत बारामतीची जागा कोण लढवणार याची अधिकृत घोषणा अद्याप झालेली नाही. परंतु बारामतीत खा. सुप्रिया सुळे विरुद्ध सुनेत्रा पवार लढणार हे ही आता लपून राहिलेले नाही. या स्थितीत बारामतीच्या लढाईला महाभारताचे स्वरुप आले असून उपमुख्यमंत्री अजित पवार चक्रव्यूह कसा भेदतात, यावर निकालाची गणिते अवलंबून असतील.

ज्येष्ठ नेते शरद पवार यांच्यापासून फारकत घेत अजित पवार यांनी पक्ष आणि चिन्हही मिळविले. त्यावेळी बारामतीत सबकुछ अजितदादा असे चित्र होते. परंतु अत्यंत कसलेले राजकारणी असलेल्या शरद पवार यांनी एकेक डाव अत्यंत पद्धतशीरपणे टाकण्यास सुरुवात केली. परिणामी ही निवडणूक आता लढतीपूर्वीच अत्यंत रंगतदार अवस्थेत येवून पोहोचली आहे.
एक भावजय विरोधात, दुसरी साथीला, सुप्रिया सुळेंसाठी रोहित पवारांच्या मातोश्री मैदानात

अजित पवार यांनी यापूर्वीच सांगितल्याप्रमाणे त्यांच्यासोबत पत्नी आणि दोन मुले वगळता कुटुंबातील कोणीही नाही, याचा प्रत्यय येवू लागला आहे. त्यांचे सख्खे बंधू उद्योजक श्रीनिवास, भावजय शर्मिला आणि पुतण्या युगेंद्र यांनी त्यांची साथ सोडली आहे. अशा स्थितीत ‘पराये लोगों से क्या शिकायत, घाव तो अपनों के ज्यादा चुभते है’, अशीच भावना अजितदादांच्या मनात सलत असेल.
Baramati Lok Sabha Constituency: महायुतीत मिठाचा खडा पडला; बारामतीत अजित पवारांची धाकधूक वाढली

दुसरीकडे चुलतबंधू व अॅग्रीकल्चरल डेव्हलपमेंट ट्रस्टचे चेअरमन राजेंद्र पवार, त्यांच्या पत्नी सुनंदा, मुलगी सई यांनीही खा. सुळे यांचा प्रचार सुरु केला आहे. त्यामुळे निवडणूकीत मोठी रंगत निर्माण झाली आहे. घरातूनच असा प्रबळ विरोध निर्माण झालेला असताना पुरंदरमधून माजी मंत्री विजय शिवतारे हे अजूनही लढण्यावर ठाम आहेत. ते लढले नाहीत, महायुतीच्या प्रचारात भविष्यात उतरले, असे गृहित धरले तरी त्यांनी अजित पवारांवर ज्या भाषेत टीका केली आहे ते लक्षात घेता त्यांचे कार्यकर्ते महायुतीच्या उमेदवाराला कितपत साथ देतील याबद्दल शंका आहे.

इंदापुरात हर्षवर्धन पाटील यांनी अद्याप भूमिका स्पष्ट केलेली नाही. भाजपकडून त्यांना देशस्तरावरील साखर उद्योगाचे दिलेले पद लक्षात घेता त्यांना आज ना उद्या महायुतीचे काम करावेच लागणार आहे. सध्या शिवतारे व हर्षवर्धन हे दोघेही गॅरंटीची मागणीवर ठाम आहेत. एकदा तशी गॅरंटी त्यांना मिळाली तर त्यांना प्रचारात उतरावेच लागेल. पण इंदापुरातही पाटील यांच्या कार्यकर्त्यांना अजित पवार यांचा राग आहे. पाटील यांनी सांगितलेले ते ग्राऊंड लेव्हलला कितपत उतरवतील याबद्दल शंका आहे.