म. टा. प्रतिनिधी, नाशिक : ‘भारत जोडो न्याय यात्रे’निमित्ताने नाशिक जिल्हा दौऱ्यावर येणारे ज्येष्ठ काँग्रेस नेते खासदार राहुल गांधी यांची तोफ गुरुवारी (दि. १४) दिंडोरी लोकसभा मतदारसंघातील चांदवड येथे धडाडणार आहे. या दौऱ्यात खासदार गांधी हे शेतकऱ्यांच्या प्रश्नांना हात घालणार असून, या सभेला मोठी गर्दी जमविण्यासाठी काँग्रेसकडून जोरदार प्रयत्न सुरू आहेत.

कांदा निर्यातबंदीसह पिकांना हमीभाव मिळत नसल्याने नाशिकसह राज्यातील शेतकऱ्यांमध्ये कमालीची नाराजी आहे. या पार्श्वभूमीवर काँग्रेसने ‘शेतकरी जोडो’ची तयारी केली आहे. देशभरातील शेतकऱ्यांचे दिल्लीच्या सीमेवरील आंदोलन हाताळण्यात केंद्र सरकारला अपेक्षित यश आलेले नाही. शेतकऱ्यांच्या मागण्यांचा सकारात्मक विचार करण्याऐवजी आंदोलन मोडून काढण्याचे धोरण सरकारद्वारे अवलंबिले गेले. गेल्या काही वर्षांत नैसर्गिक संकटांमुळे शेतकऱ्यांपुढील अडचणींत वाढच झाली आहे. पिकांना हमीभाव मिळावा, २४ तास अखंडित वीजपुरवठा मिळावा यांसारख्या मागण्या वर्षानुवर्षे प्रलंबितच आहेत. कांदा पिकाला भाव मिळण्यास सुरुवात होताच केंद्र सरकारने कांदा निर्यातबंदीचा निर्णय घेतला. या निर्यातबंदीलाही शेतकऱ्यांचा विरोध असून, मार्क्सवादी कम्युनिस्ट पक्षाचे ज्येष्ठ नेते जे. पी. गावित यांच्या नेतृत्वाखाली हजारो शेतकऱ्यांनी आठवडाभर जिल्हाधिकारी कार्यालयासमोर ठिय्या मांडला होता. लोकसभा निवडणुकीचा बिगुल कोणत्याही क्षणी वाजण्याची शक्यता असताना शेतकरी मात्र सरकारविरोधात भूमिका घेत असल्याचे चित्र जिल्ह्यात आहे. या पार्श्वभूमीवर काँग्रेसने ‘शेतकरी जोडो’ची तयारी केली आहे.

कार्यकारिणी लागली कामाला

राहुल गांधी यांची ‘भारत जोडो न्याय यात्रा’ या आठवड्यात नाशिकमार्गे मुंबईकडे मार्गस्थ होणार आहे. गुरुवारी सकाळी नऊ वाजता ही यात्रा चांदवड शहरात दाखल होईल. यावेळी ते जिल्ह्यातील शेतकऱ्यांशी संवाद साधणार आहेत. चांदवडसह निफाड, नांदगाव, मालेगाव, बागलाण, देवळा, कळवण, नाशिक तालुक्यातील शेतकरी या सभेत सहभागी होणार आहेत. अधिकाधिक शेतकऱ्यांनी सभेला उपस्थित राहावे, याकरिता काँग्रेसची जिल्हा आणि तालुका कार्यकारिणी तयारीला लागली आहे.
काँग्रेसचे १७ मार्चला मुंबईत शक्तिप्रदर्शन, कामाला लागण्याचे आदेश
राहुल गांधींचा दौरा असा…

बुधवार, दि. १३ मार्च
दुपारी २.३० : झोडगे, ता. मालेगाव येथे स्वागत
दुपारी ३ : मालेगाव शहरातील दरेगाव येथे आगमन
दुपारी ३ ते ५ : दरेगाव-नवीन बसस्थानक-छत्रपती शिवाजी महाराज पुतळा-महात्मा जोतिबा फुले पुतळामार्गे ‘रोड शो’
सायंकाळी ६ : सौंदाणे येथे मुक्काम

गुरुवार, दि. १४ मार्च
सकाळी ८.३० : चांदवडकडे मार्गस्थ
सकाळी ९ : चांदवड येथे संवाद सभा
दुपारी १२ : पिंपळगाव बसवंत येथे आगमन
दुपारी १ : ओझर येथे आगमन
दुपारी २ ते ५ : द्वारका चौक येथून शहरात ‘रोड शो’
सायंकाळी ५ ते ६ : त्र्यंबकेश्वर येथे आगमन
सायंकाळी ७ : मोखाडा येथे मुक्काम