म. टा. विशेष प्रतिनिधी:महाविकास आघाडीत लोकसभा जागावाटपाचा तिढा कायम असून, पक्षांकडून उमेदवारांची एकतर्फी घोषणा होत असल्याने नवा पेच निर्माण झाला आहे. शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी उत्तर पश्चिम मुंबई लोकसभा मतदारसंघातून अमोल कीर्तीकर यांच्या नावाची घोषणा केल्याने मुंबई काँग्रेसचे माजी अध्यक्ष आणि लोकसभेचे इच्छुक उमेदवार संजय निरुपम संतप्त झाले आहेत. त्यांनी रविवारी पत्रकार परिषद घेऊन कीर्तिकर यांच्या उमेदवारीला आक्षेप घेतला. मात्र, उद्धव ठाकरे यांनी कीर्तिकर यांच्यासमोर उभ्या राहणाऱ्या उमेदवाराची अनामत रक्कम जप्त करण्याचे आवाहन कार्यकर्त्यांना करून उमेदवारीवर ठाम असल्याचे स्पष्ट केले.महाविकास आघाडीचे लोकसभेचे जागावाटप अद्याप अंतिम झालेले नाही. या आघाडीत वंचित बहुजन आघाडीच्या समावेशाविषयी अनिश्चितता आहे. मात्र, आघाडीतील काँग्रेसने कोल्हापूरमधील शाहू महाराज, राष्ट्रवादी काँग्रेस शरदचंद्र पवार पक्षाने बारामतीमधून सुप्रिया सुळे यांच्या उमेदवारीची घोषणा केली आहे. त्यातच उद्धव ठाकरे यांनी शनिवारी अंधेरी येथील एका कार्यक्रमात उत्तर पश्चिम लोकसभा मतदारसंघातून अमोल कीर्तीकर यांच्या उमेदवारीवर शिक्कामोर्तब केले. त्यामुळे संजय निरुपम संतापले. ‘करोनाकाळातील गरिबांच्या खिचडी वाटप घोटाळ्यातील आरोपीची उमेदवारी जाहीर करण्याची घाई का,’ असा सवाल त्यांनी पत्रकार परिषदेत केला.
‘अद्याप जागावाटप झालेले नसताना ‘उबाठा’ गटाकडून अशी उमेदवारी कशी जाहीर केली जाऊ शकते, आघाडीच्या दोन डझन बैठका झाल्या असून, अद्याप जागावाटपाचा अंतिम निर्णय झालेला नाही. ठाकरे गटाकडून एकतर्फी उमेदवारी जाहीर होत असेल तर हे आघाडीच्या धर्माचे उल्लंघन आहे,’ असे निरुपम यांनी म्हटले आहे. घोटाळ्यातील आरोपीचा काँग्रेस आणि शिवसेनेच्या कार्यकर्त्यांनी प्रचार करावा काय, असा सवाल करीत निरुपम यांनी या प्रकरणी वरिष्ठ काँग्रेस नेत्यांनी हस्तक्षेप करण्याची आणि शिवसेना उद्धव बाळासाहेब पक्षाने उमेदवारीची मागे घेण्याची मागणी केली.
दुसरीकडे, ठाकरे यांनी महाविकास आघाडीचा दाखला देऊन रविवारीही अमोल कीर्तीकर यांना निवडून देण्याचे आवाहन केले. अमोल कीर्तीकरांचा विजय हा विरुद्ध उमेदवाराची अनामत रक्कम जप्त करून व्हायला हवा, असे ठाकरे म्हणाले. ‘हा लढा गद्दार विरुद्ध निष्ठावान असा आहे. एका बाजूला देशभक्त आणि दुसऱ्या बाजूला द्वेषभक्त असा लढा आहे,’ असे ठाकरे रविवारी मुंबईतील सभेत म्हणाले.
अकोल्यात आघाडीविरोधात बॅनरबाजी
वंचित बहुजन आघाडी आणि महाविकास आघाडीत लोकसभेच्या जागावाटपावरून मतभेद कायम असताना रविवारी अकोला शहरात अकोलेकरांच्या नावाने महाविकास आघाडीला सवाल करणारे अनेक बॅनर लावण्यात आले. महाविकास आघाडी जर वंचित बहुजन आघाडीसोबत आहे, तर दोन फेब्रुवारीपासून २७ फेब्रुवारीपर्यंत अंतर्गत बैठका आणि चर्चेतून ‘वंचित’ला दूर का ठेवले? ३० जानेवारीच्या बैठकीत वंचितच्या प्रतिनिधीला बैठकीचे बाहेर का बसवले?, महाविकास आघाडी जर प्रकाश आंबेडकर यांच्यासोबत आहे, तर अकोल्यातून प्रकाश आंबेडकर यांना आपले उमेदवार म्हणून घोषित का करत नाही, असे अनेक प्रश्न या बॅनरच्या माध्यमातून महाविकास आघाडीला करण्यात आले आहेत.