भाविक पाटील, मिरा-भाईंदर: मिरा-भाईंदर महापालिकेची अग्निशमन यंत्रणा सक्षम करण्यासाठी आता हालचाली सुरू करण्यात आल्या आहेत. जवानांसाठी अद्ययावत अशा गणवेशखरेदीची निविदा नुकतीच प्रसिद्ध करण्यात आली आहे. तसेच, वाहनांच्या देखभालीचे कंत्राट देण्याचा व काही वाहने खरेदीचा विचार पालिकेकडून केला जात आहे. मागील आठवड्यात लागलेल्या भीषण आगीवर नियंत्रण मिळवताना अग्निशमन दलाला सुरक्षासाधने व सामुग्रीअभावी अडचणींना सामोरे जावे लागल्याचे वृत्त ‘मटा’ने प्रसिद्ध केले होते. त्यानंतर प्रशासनाने या कार्यवाहीला सुरुवात केली आहे.भाईंदर पश्चिमेच्या आझाद नगर झोपडपट्टीला २८ फेब्रुवारी रोजी भीषण आग लागली होती. यावेळी महापालिकेच्या अग्निशमन जवानांनी हेल्मेट, हातमोजे, जॅकेट व बूट या सुरक्षासाधनांअभावी स्वतःचा जीव धोक्यात घालून आगीवर नियंत्रण मिळवण्याचा आटोकाट प्रयत्न केला. धुराचा त्रास होऊ नये, यासाठी फेस मास्क, ऑक्सिजन टँक आदी साधनेही त्यांना देण्यात आली नव्हती. त्यामुळे अनेक जवानांना त्रास सहन करावा लागला. शिवाय, वाहनांची देखभाल-दुरुस्ती केली जात नसल्याने पंपाला गळती लागली होती. तसेच, पाण्याच्या टँकरची कमतरता असल्याने आग विझवण्यात अनेक अडथळे येत होते.
यापूर्वीही सुरक्षा साधनांअभावी कर्मचारी जखमी झाल्याच्या घटना घडल्या होत्या. त्यामुळे महापालिका प्रशासनाने अग्निशमन यंत्रणेचा आढावा घेऊन आवश्यक साधने तातडीने ताफ्यात समाविष्ट करावे अन्यथा जवानांच्या जीवाला धोका असल्याचे वृत्त १ मार्च रोजी ‘मटा’च्या ‘वसई-विरार प्लस’मध्ये प्रसिद्ध करण्यात आले होते. त्याची दखल अखेर महापालिका आयुक्त संजय काटकर यांनी घेतली आहे. त्यांच्या आदेशानुसार अग्निशमन जवान व कंत्राटी मजुरांसाठी २०० गणवेश खरेदीसाठीची दीड कोटींची निविदा नुकतीच प्रसिद्ध करण्यात आली आहे. त्यात जॅकेट, हेल्मेट, बूट, फेस मास्क आदींचा समावेश आहे. तसेच, अग्निशमन वाहने योग्य स्थितीत असावीत, यासाठी त्यांच्या दैनंदिन देखभाल-दुरुस्तीकरिता खासगी कंपनीला कंत्राट देण्याचा विचार सुरू आहे. पाण्याच्या टँकरची कमतरता भासत असल्याने १६ हजार लिटर पाण्याची साठवणूक करण्याची क्षमता असलेले तीन टँकर खरेदी करण्याचाही विचार आहे. त्यासाठी अर्थसंकल्पातील तरतुदींची माहिती घेतली जात आहे. विभागातील रिक्त पदे करण्याच्या कार्यवाहीलाही गती दिली जाणार असल्याचे अग्निशमन विभागाकडून सांगण्यात आले.
विभागासाठी आवश्यक असणाऱ्या बाबींची पूर्तता करण्याचा निर्णय घेण्यात आला आहे. गणवेश व इतर साहित्य लवकर उपलब्ध करून दिले जाणार आहे. गणवेशांचे पूर्वीप्रमाणे वैयक्तिकरीत्या वाटप केले जाणार नसून ते वाहनांतच ठेवले जाणार आहेत. घटनास्थळी पोहोचल्यावर आवश्यकतेप्रमाणे त्याचा वापर जवानांना करता येणार आहे.
– प्रकाश बोराडे, मुख्य अग्निशामक अधिकारी, मिरा-भाईंदर महापालिका
‘अग्निशमन यंत्रणा आपल्या दारी’
मिरा-भाईंदरमधील अनेक इमारतींमध्ये अग्निशमन यंत्रणा बसवण्यात आली आहे. परंतु प्रशिक्षणाअभावी त्याचा वापर नागरिकांना करता येत नाही. त्यासाठी त्यांना महापालिकेचे अग्निशमन दल येण्याची वाट पाहावी लागते. तोपर्यंत अनेकदा आगीने रौद्ररूप धारण केलेले असते. त्यामुळे आता मनपाने नागरिकांना अग्निशमन यंत्रणेचा वापर करण्याचे प्रशिक्षण देण्याचा निर्णय घेतला आहे. त्यासाठी ‘अग्निशमन यंत्रणा आपल्या दारी’ ही मोहीम राबवली जाणार आहे. इमारती व झोपडपट्टी अशा सर्वच परिसरात नागरिकांना प्रशिक्षण दिले जाणार आहे.