मुंबई : मी राजकीय भूमिका घेतली आहे, आम्हाला आता जी विचारधारा मान्य आहे, त्यावर आम्ही अंमलबजावणी केली, असं महाराष्ट्राचे उपमुख्यमंत्री अजित पवार म्हणाले. ‘झी गौरव पुरस्कार २०२४’ हा सोहळा नुकताच पार पडला. यावेळी संगीतकार-गायक अवधूत गुप्ते यांनी ‘खुपते तिथे गुप्ते’ या कार्यक्रमाच्या स्टाईलमध्ये अजित पवार यांची मनमोकळी मुलाखत घेतली. अजितदादांनी सुपुत्र पार्थ पवार, खासदार भगिनी सुप्रिया सुळे, राजकीय भूमिका यावरील प्रश्नांना मनमोकळी उत्तरं दिली. राष्ट्रवादीतील फुटीनंतर सुप्रिया सुळे ‘खुपते तिथे गुप्ते’मध्ये सहभागी झाल्या असता, त्यांना अजितदादांचा व्हिडिओ दाखवला होता, ज्यावर ‘एक हजारों में मेरी बहना है’ हे गाणं लावण्यात आलं होतं. त्यावेळी त्यांना अश्रू अनावर झाले होते. ही क्लीप यावेळी अजितदादांना दाखवण्यात आली.

या पुरस्कार सोहळ्यात अजित पवार अवधूत गुप्तेंनी विचारलेल्या प्रश्नांना सामोरे गेले. “मी जास्त चित्रपट पाहत नाही. पण कॉलेजच्या काळात मला अमिताभ बच्चन आवडायचे, नंतरच्या काळात शाहरुख खान आला, त्यामुळे वयानुसार आवड असते” असं अजित पवार मिश्किलपणे म्हणाले. जर तुमच्यावर बायोपिक करायचा म्हटलं तर कोणी अभिनय करावा? असा प्रश्न विचारल्यावर अजितदादांनी डॉक्टर निलेश साबळे यांचं नाव घेतलं. त्यावेळी साबळेंनी अजितदादांची मिमिक्री देखील करून दाखवली.
भाजप ‘खूपच मोठा’ भाऊ! राज्यात ३७ जागा लढण्याचे संकेत, मुंबईत ५ मतदारसंघांवर डोळा, शिंदेंना काय?
कार्यक्रमात एक गेम खेळत असताना अवधूत गुप्ते यांनी ‘थंड बर्फ कोणाला द्यावा? जेणेकरून डोक्यावर ठेऊन डोकं शांत केलं जाईल’, असा सवाल विचारला तेव्हा अजितदादांनी पार्थ पवार यांचं नाव घेतलं. तर रिमोट कंट्रोल कोणाला द्यावा, असं विचारलं असता “तो माझ्याच हातात राहू द्या” असं म्हणत हशा पिकवला.
माझ्या १३ खासदारांची तिकिटं तरी कापू नका, शिंदेंची विनंती, शहा म्हणाले, एक गोष्ट समजून घ्या…
“आमच्या कुटुंबात प्रत्येकाला व्यक्तिस्वातंत्र्य आहे. राजकीय स्वातंत्र आहे, मी इतकी वर्ष वडिलधाऱ्यांचा आदर करत आलो आहे, यापुढेही वडिलधाऱ्यांचा आदर करत राहणार आहे. ही आपली महाराष्ट्राची संस्कृती आहे, महाराष्ट्राची परंपरा आहे. पण पाठीमागच्या काळात आम्हाला जी विचारधारा योग्य वाटत होती, आता आम्हाला असं वाटतं की आम्ही ज्या रस्त्यावर चालत आहोत, ती योग्य आहे.” असं अजित पवार म्हणाले.

Read Latest Maharashtra News Updates And Marathi News

“राष्ट्रवादी काँग्रेसच्या मेजॉरिटी मान्यवरांनी घेतलेला निर्णय, त्याचं समर्थन करावं, असं आम्हाला वाटतं. आधी आम्ही आमचे प्रमुख जे सांगत होते, त्याचं समर्थन करत होतो, आम्ही काही वेगळं केल्यातला भाग नाही. काही जण म्हणतात भाजपसोबत कसे जाऊ शकता? पण आम्ही आमच्या पक्षाची वेगळी विचारधारा घेऊन भाजपसोबत जाऊ शकतो. जर आम्ही कधी काळी शिवसेनेबरोबर जाऊ शकतो, तर शिवसेना आणि भाजपमध्ये फार काही फरक आहे अशातला भाग नाही” असंही अजितदादा म्हणाले.