मुंबई: भाजपने लोकसभेच्या उमेदवारांची पहिली यादी जाहीर केली. पण, त्यामध्ये महाराष्ट्रातील एकही उमेदवाराचं नाव नव्हतं. त्यावरुन असं दिसून येतं की राज्यातील महायुतीमधील भाजप, शिंदे गट आणि अजित पवार गट यांच्यातील जागावाटपाचा पेच अद्याप सुटलेला नाही. याचदरम्यान आता शिवसेना शिंदे गटाने महाराष्ट्रात लोकसभेच्या २२ जागा मागितल्याचं समोर आलं आहे. शिंदे गटाचे मंत्री शंभुराज देसाई यांनी सांगितलं की, शिवसेनेने २०१९ च्या निवडणुकांमध्ये धनुष्यबाणाच्या चिन्हावर २२ जागांवरुन निवडणूक लढवली होती. या निवडणुकीतही आमची तेवढ्याच जागांची मागणी आहे.

लोकसभा २०२४ निवडणुकी हा महायुतीमधील भाजप, शिवसेना शिंदे गट आणि राष्ट्रवादी अजित पवार गट एकत्रच लढतील हे तर निश्चित आहे. कुठला पक्ष किती जागांवर आणि कोणता पक्ष कोणत्या मतदारसंघातून निवडणूक लढवेल यावर अद्याप निर्णय बाकी आहे. याविषयी प्रत्येक पक्षाच्या बैठका पार पडल्या आहेत आणि त्याचा अहवालही सादर करण्यात आला आहे. शिवसेना शिंदे गटाने दिलेल्या माहितीनुसार, त्या सर्व २२ लोकसभा मतदार संघांचा आढावा घेण्यात आला असून त्याचा अहवाल मुख्यमंत्री एकनाथ शिंदे यांना देण्यात आला आहे. आता अंतिम निर्णय हा त्यांचा असेल.
अजित पवार शिरुरच्या मोहिमेवर असताना मावळमध्ये भूकंप, १३७ समर्थक शरद पवारांच्या टीममध्ये?

शिंदे गट २२ जागांसाठी आग्रही

शिंदे गटाने दिलेल्या माहितीनुसार, त्यांनी २०१९ मध्ये २२ जागांवरुन निवडणूक लढवली होती आणि त्यापैकी १८ जागा त्यांनी मिळवल्या होत्या. त्यामुळे यंदाही २२ जागा मिळवण्यासाठी ते आग्रही आहेत. लवकर याबाबत तिन्ही पक्ष मिळून निर्णय घेतील. महायुती सरकारमधील वातावरण चांगलं असून कोणीही नाराज नाही, असंही शिंदे गटाने स्पष्ट केलं. जागावाटपाबाबत बैठकीत चर्चा केली जाईल आणि योग्य तो मार्ग काढला जाईल. कोणीही नाराज होणार नाही, असंही त्यांनी सांगितलं.

अमित शाह यांचा महाराष्ट्र दौरा

महाराष्ट्रात भाजप आपल्या सोबतच्या पक्षांना जागा देईल पण एका अटीवर की त्यांनी निवडणूक कमळ चिन्हावर लढवावी, अशी चर्चा सुरु आहे. ५ मार्चला गृहमंत्री अमित शाह हे महाराष्ट्राच्या दौऱ्यावर येणार आहेत. महाराष्ट्र लोकसभेच्या जागावाटपाच्या मुद्द्यावरुन त्यांचा हा दौरा अत्यंत महत्त्वाचा मानला जात आहे. यावेळी अमित शाह हे जागावाटपाचा तिढा सोडवण्याची शक्यता वर्तवली जात आहे.