पुणे : लोकसभा निवडणुका काही दिवसांवर येऊन ठेपल्या आहेत. लोकसभा निवडणुकांच्या पूर्वी महाराष्ट्रात महायुतीला मोठा धक्का बसण्याची शक्यता आहे. गोपीनाथ मुंडे यांनी भाजपसोबत आणलेला राष्ट्रीय समाज पक्ष आता महायुतीमधून बाहेर पडण्याची दाट शक्यता आहे. रासपचे अध्यक्ष महादेव जानकर हे भाजपवर नाराज असल्याने ते वेगळी वाट निवडणार असल्याचे आता जवळपास स्पष्ट झाले आहे.
आज पुण्यात झालेल्या महायुतीच्या बैठकीला महादेव जानकर यांच्या रासपला निमंत्रण देण्यात आले नव्हते. महादेव जानकर यांनी स्वतः भाजपने आपल्याला कोणत्याही बैठकीला आमंत्रण देऊ नये, अशी भूमिका घेतली असल्याची माहिती भाजप नेते आणि मंत्री चंद्रकांत पाटील यांनी स्वतः दिली आहे. महादेव जानकर यांच्या राष्ट्रीय समाज पक्षाबाबत त्यांचे काही म्हणणे आहे. २०१४ ते २०१९ दरम्यान ते आमच्या सोबत होते, मंत्री होते. ते पंकजा मुंडे यांचे लहान भाऊ पंकजा ताई त्यांच्या मोठ्या भगिनी आहेत. देवेंद्र फडणवीस त्यांचे परम मित्र आहेत. त्यामुळे देवेंद्र फडणवीस आणि पंकजा मुंडे हे महादेव जानकर यांचे म्हणणे सॉर्ट आऊट करतील. पण त्यांचे असे मत आहे की, माझे जे म्हणणे आहे ते जोपर्यंत सुटत नाही तोपर्यंत मला बैठकीला बोलावू नका. त्यामुळे त्यांना बैठकीला बोलावले नाही, असे चंद्रकांत पाटील म्हणाले आहेत.
महादेव जानकर हे महायुतीमध्ये नाराज असल्याने ते आता महाविकास आघाडी सोबत जाणार असल्याच्या चर्चा सुरू आहेत. त्याचे कारण म्हणजे राष्ट्रवादी काँग्रेस शरद पवार यांच्या पक्षाकडे असणारी माढा लोकसभेची जागा ते महादेव जानकर यांच्याकरिता सोडण्यासाठी तयार झाले आहेत. मात्र महादेव जानकर हे माढा या लोकसभा मतदारसंघांसोबतच परभणी लोकसभा मतदारसंघासाठी देखील आग्रही आहे. त्यामुळे महाविकास आघाडी सोबत जाण्याच्या चर्चेच घोंगड अजूनही भिजत आहे. मात्र शरद पवार यांनी माढा लोकसभा मतदारसंघ सोडण्याच्या भूमिकेचे महादेव जानकर यांनी स्वागत केले आहे. त्यामुळे महादेव जानकर हे महाविकास आघाडीची साथ देणार असल्याचे बोलले जात आहे.
महादेव जानकर यांच्या रूपाने महायुतीला हा लोकसभा निवडणुकांपूर्वी मोठा धक्का मानला जात आहे. महाराष्ट्रात कुठल्याही निवडणुकीत सोशल इंजिनिअरिंग करून निवडणुका लढवल्या जातात. आणि महादेव जानकर महाराष्ट्रातल्या सोशल इंजिनिअरिंग राजकारणाचा एक अविभाज्य घटक असल्याने लोकसभा निवडणुकीत त्यांनी महायुतीची साथ सोडल्यास हा महायुतीसाठी मोठा धक्का असणार आहे. मात्र आता महादेव जानकर नेमका काय निर्णय घेणार याकडे राज्याचे लक्ष लागले आहे.