धनाजी चव्हाण, परभणी: लोकसभा निवडणुकीची आता सर्वत्र जोरदार तयारी सुरू आहे. कालच भाजपच्या वतीने लोकसभेच्या उमेदवारांची पहिली यादी जाहीर करण्यात आली आहे. परभणी लोकसभा मतदारसंघातही महाविकास आघाडी कडून विद्यमान खासदार संजय जाधव यांची उमेदवारी फायनल आहे. पण खरी तिकिटाची रस्सीखेच सुरू आहे महायुतीमध्ये. महायुतीतून राष्ट्रवादी काँग्रेसचे राजेश विटेकर हे मागील बऱ्याच दिवसांपासून लोकसभेच्या तयारीला लागले आहे. प्रत्यक्ष निवडणूक प्रचाराला त्यांनी सुरुवातही केली आहे. त्याचबरोबर भाजपकडून माजी आमदार रामप्रसाद बोर्डीकर हे देखील कामाला लागले आहेत. शिवसेनेकडूनही या लोकसभा मतदारसंघावर दावा ठोकण्यात आलेला आहे. पण, प्रत्यक्षात कामाला मात्र कोणी सुरुवात केलेली नाही.
परभणी लोकसभा मतदारसंघ हा पूर्वापार शिवसेनेचा बालेकिल्ला आहे. पण, या वेळेस शिवसेना आणि धनुष्यबाण हे दोन्हीही मुख्यमंत्री एकनाथ शिंदे यांना मिळाले आहे. त्यामुळे या परभणी लोकसभा मतदारसंघावर शिवसेनेने देखील दावा ठोकला आहे. उमेदवारी संदर्भात माजी मंत्री अर्जुन खोतकर यांच्यासह अन्य एक दोन नावाची चर्चा देखील सुरू आहे. पण, प्रत्यक्षात मात्र शिवसेना प्रचाराच्या रिंगणात मात्र अद्यापही उतरलेली नसल्याचे दिसून येत आहे.
तर, दुसरीकडे महायुती मधून राष्ट्रवादी काँग्रेस पक्ष मात्र निवडणुकीची जोरदार तयारी करत आहे. राष्ट्रवादीकडून परभणी लोकसभेचे उमेदवार राजेश विटेकर यांच्या नावाची जोरदार चर्चा आहे. मागील लोकसभा निवडणुकीत थोड्या फरकाने पराभव पत्करल्यानंतर यावेळेस मात्र त्यांनी चांगलीच कंबर कसली आहे. मागील महिनाभरात त्यांनी कृषिमंत्री धनंजय मुंडे यांच्या नेतृत्वात मानवत तालुक्यात मोठ्या प्रमाणावर विकास कामांच्या उद्घाटनासोबत प्रचार सभा ही घेतल्या. मागील काही दिवसापूर्वी परभणी येथे प्रदेशाध्यक्ष सुनील तटकरे यांच्या उपस्थितीत युवकांचा मेळावा देखील झाला. वेगवेगळ्या समित्यावर राष्ट्रवादी काँग्रेसच्या पदाधिकाऱ्यांच्या निवडी देखील करण्यात येत आहे. त्यामुळे राजेश विटेकर हे चांगलेच कामाला लागल्याचे दिसून येत आहे.
भाजपकडून परभणी लोकसभा मतदारसंघात डझनभर उमेदवार इच्छुक आहेत. माजी आमदार रामप्रसाद बोर्डीकर, आमदार मेघना बोर्डीकर, माजी मंत्री बबनराव लोणीकर, डॉक्टर केदार कटिंग, आनंद भरोसे यांच्यासह बरेच जण इच्छुक आहेत. पण प्रत्यक्षात मात्र माजी आमदार रामप्रसाद बोर्डीकर हे परभणी लोकसभा मतदारसंघातून निवडणूक लढविण्यासाठी चांगलेच कामाला लागले आहे. मागील दोन महिन्यापासून ते लोकसभा मतदारसंघातील तालुका निहाय भेटी देत आहेत. कार्यकर्त्यांचे प्रश्न सोडविण्याचा प्रयत्न करत आहेत. त्याचबरोबर पक्षाकडे उमेदवारी देखील तेवढ्याच ठामपणे मागत आहे.
एकंदरीतच परभणी लोकसभा मतदारसंघांमध्ये महायुतीकडून भाजप आणि राष्ट्रवादीमध्ये तिकिटासाठी प्रचंड स्पर्धा सुरू आहे. जागा राष्ट्रवादीला सुटते की भाजपल हे येणाऱ्या काळात निश्चित होईल. पण तयारी मात्र भाजप आणि राष्ट्रवादी मोठ्या प्रमाणावर करत असताना दिसून येत आहे. त्याचबरोबर शिवसेना देखील परभणी लोकसभा मतदारसंघावरचा आपला दावा सांगत आहे. त्यामुळे परभणी लोकसभा मतदारसंघाची जागा महायुतीत कोणाला सुटेल हे येणारा काळच ठरवेल. पण सध्या तरी जागा सोडवून घेण्यावरून आणि तिकीट मिळवण्यासाठी महायुतीत मात्र रस्सीखेच जोरात सुरू असल्याचे दिसून येत आहे.