म. टा. प्रतिनिधी, नाशिक : आगामी लोकसभा निवडणुकीच्या पार्श्वभूमीवर पोलिस अधिकारी-अंमलदारांना प्रशिक्षण दिल्यानंतर आता प्रतिबंधात्मक कारवायांची ‘रणनिती’ आखण्यात आली आहे. त्यासाठी पोलिस ठाणेनिहाय समन्वयक अधिकारी नियुक्त करण्यात येत आहे. त्यानुसार सराइत, संशयितांसह समाजविघातक कृत्ये करणाऱ्यांविरुद्ध प्रतिबंधात्मक कारवाईत वाढ करण्यात येणार आहे. या निर्णयामुळे पोलिस आयुक्तालयात निवडणुकांपूर्वीच्या कामकाजांनी वेग पडकला आहे.

पोलिस आयुक्त संदीप कर्णिक यांच्या आदेशान्वये, उपायुक्त किरणकुमार चव्हाण, प्रशांत बच्छाव, मोनिका राऊत, चंद्रकांत खांडवी यांनी त्यांच्या विभागातील अधिकाऱ्यांना प्रतिबंधात्मक कारवाईत वाढ करण्याचे निर्देश दिले आहेत. त्यान्वये, सर्व सहायक आयुक्त व वरिष्ठ पोलिस निरीक्षकांची पथके त्यासंदर्भातील कामकाज करीत आहेत. यासह गुन्हे शोध पथकांना सराइतांची धरपकड करण्यासह संशयितांचा माग काढण्याची सूचना करण्यात आली आहे. दरम्यान, आगामी निवडणुकांच्या पार्श्वभूमीवर शहरातील गुन्हेगार सक्रीय होण्याची शक्यता नाकारता येत नाही. यासह शहराबाहेरून, परराज्यातून संशयित येत आयुक्तालय हद्दीत गुन्हा करण्याचीही शक्यता असते. त्या पार्श्वभूमीवर प्रत्येक पोलिस ठाणेनिहाय प्रतिबंधात्मक कारवाईकरिता समन्वयक अधिकारी नेमण्याचे निर्देश देण्यात आले आहेत. पोलिस ठाण्यातील गुन्हे निरीक्षक हे त्यासाठीचे समन्वयक असतील. त्यांचे पथक संशयितांवर नजर ठेवण्यासह हद्दपारी, एमपीडीए, मोक्कांतर्गत कारवाईत वाढ करेल. बीटमार्शलदेखील हद्दीत संशयितांना हेरून त्यांच्यावर प्रतिबंधात्मक कारवाई करतील. तसेच सतत गुन्हे करणाऱ्यांविरुद्ध सहायक आयुक्त व उपायुक्त कार्यालयामार्फत कठोर कारवाई प्रस्तावित होण्याची चिन्हे आहेत. या कारवायांचा आढावा महिन्याकाठी घेण्यासंदर्भात आयुक्तालयाने नियोजन केले आहे.
पोलिसांना हवे पसंतीचे ‘ठाणे’; नाशिकमधून ४१ अधिकाऱ्यांच्या बदल्या, सर्वाधिक जण ठाण्यात नियुक्त
…यांच्यावर करडी नजर

– हल्लेखोर, तसेच संशयित हालचाली करणारे
– विधीसंघर्षित बालक (अल्पवयीन)
– संशयितांना मदत करणारे; समाजविघातक
– अवैध शस्त्रे बाळगणारे, व्यवसाय करणारे

‘त्यांना’ नोकरीचे सहकार्य

विधीसंघर्षित बालकांचे गुन्ह्यांपासून परावृत्त करण्यासाठी समुपदेशन करण्यात येत आहे. यापैकी अनेकजण हे सोळा ते अठरा वयोगटातील असतात. त्यामुळे अठरा वर्षे पूर्ण होत असलेल्यांना खासगी नोकरी मिळवून देण्यासाठी पोलिस प्रयत्न करणार आहेत. विधीसंघर्षित बालकांना शासकीय योजनांबाबत माहिती देत, त्यामार्फत स्वयंरोजगार किंवा रोजगार संधी उपलब्ध करून द्याव्यात, अशाही सूचना आयुक्तालयाने दिल्या आहेत.