पुणे: आंबेगाव तालुका हा सहकारमंत्री दिलीप वळसे पाटील यांचा बालेकिल्ला. राष्ट्रवादी काँग्रेसमध्ये फूट पडल्यानंतर या मतदारसंघाला महत्व प्राप्त झाले आहे. या मतदारसंघात काही दिवसांपूर्वी शरद पवार यांनी सभा घेत वळसे पाटील यांना धडा शिकवण्याचे आव्हान येथील नागरिकांना केले होते. तसेच वळसे पाटील यांच्यावर टीकेची झोड उठवली होती. आता शरद पवार यांच्यानंतर अजित पवारांची या मतदारसंघात सभा होणार आहे. या सभेला विशेष महत्त्व प्राप्त झाले आहे.
पाणी प्रश्नासाठी रोहित पाटील आक्रमक, शेतकऱ्यांचा अधिकाऱ्यांना घेराव, कार्यालयातच ठिय्या
दरम्यान येत्या ४ मार्च रोजी राष्ट्रवादी काँग्रेसची सभा मंचर येथे पार पडणार आहे. या सभेत अजित पवार लोकसभेचा उमेदवार जाहीर करण्याची शक्यता वर्तवली जात आहे. तसेच अनेक पक्षप्रवेश देखील होणार असल्याची माहिती समोर येत आहे. अजित पवार लोकसभेच्या उमेदवाराची घोषणा करणार असल्याच्या चर्चा असून शिवाजीराव आढळराव पाटील देखील पक्षप्रवेश करणार असल्याचे बोलले जात आहे. त्यामुळे अजित पवार यांची ही सभा विशेष महत्वाची मानली जात आहे.

तर दुसरीकडे या सभेत शरद पवारांच्या टीकेला अजित पवार आणि दिलीप वळसे पाटील काय उत्तर देणार याकडे सर्वांचे लक्ष लागले आहे. राष्ट्रवादीत फूट पडल्यानंतर अजित पवार प्रत्येक मतदारसंघात आपला दौरा करत आहेत. मतदारांशी चर्चा करत आहेत. एकेकाळी दिलीप वळसे पाटील हे शरद पवार यांचे मानस पुत्र म्हणून ओळखले जायचे. मात्र त्यांनी अजित पवार यांच्यासोबत जात शरद पवार यांना फारकत दिली होती. त्यामुळे याचा मोठा धक्का शरद पवारांना बसला होता. तशी खंत देखील त्यांनी भर सभेत बोलून दाखवली होती. त्यामुळे आता अजित पवार आणि दिलीप वळसे पाटील या सभेत पवारांना काय उत्तर देणार हे पाहणे महत्वाचे ठरणार आहे.