पुणे : पुणे पोलिसांनी अंमली पदार्थ विक्रीचा पर्दाफाश केल्यानंतर पुणे पोलिसांनी विविध ठिकाणी छापे मारत कारवाई केली आहे. त्याच पार्श्वभूमीवर आता पिंपरी – चिंचवड परिसरातून पोलिसांनी दोन कोटीहून अधिक रुपयांचे २ किलो ३८ ग्रॅम अंमली पदार्थ जप्त केले आहे. पिंपरी – चिंचवड पोलिसांनी ही कारवाई केली आहे. यात एका वरिष्ठ पोलीस अधिकाऱ्याचा सहभाग असल्याची शक्यता वर्तवली जात आहे.नमामी शंकर झा (वय ३२) असं आरोपीचं नाव असून या प्रकरणी त्याला ताब्यात घेण्यात आलं आहे. आज पहाटे साडेचारच्या सुमारास पिंपळे नीलख परिसरात ही कारवाई करण्यात आली आहे. या घटनेत पोलीस हवालदार विजय अशोक मोरे यांनी फिर्याद दिली आहे.
स्वतंत्र लढलो तर किमान लोकसभेच्या ६ जागा जिंकू, जागावाटपाची चर्चा सुरू असतानाच आंबेडकरांचं विधान
पोलिसांनी दिलेल्या माहितीनुसार, पिंपळे निलख परिसरातील रक्षक चौकाच्या पुढे आरोपी नमामी झा हा राहत होता. त्या खोलीत २ किलो ३८ ग्रॅम मेफेड्रॉन हा अंमली पदार्थ आणि एक मोबाईल असा एकूण २ कोटी २ लाख १० हजार रुपये किमतीचा मुद्देमाल बेकायदेशीररित्या व्यापार करण्याच्या उद्देशाने जवळ बाळगला होता. पोलिसांना याबाबत माहिती मिळाल्यानंतर पोलिसांनी घटनास्थळी छापा टाकत आरोपीला मुद्देमालसकट ताब्यात घेतलं आहे. मात्र, यात एका मोठ्या पोलीस अधिकाऱ्याचा देखील समावेश असल्याची शक्यता पोलिसांकडून व्यक्त करण्यात येत आहे.

पुणे, सांगली, दिल्ली यानंतर आता पिंपरी चिंचवडमध्ये अंमली पदार्थ सापडल्याने एकच खळबळ उडाली आहे. शहरात कधीपासून हे अंमली पदार्थ विकले जात होते. ते कुठून आणण्यात आले होते. याबाबत पोलिसांकडून कोणतीही माहिती देण्यात आलेली नाही. मात्र, पिंपरी – चिंचवड शहरात अंमली पदार्थ सापडल्याने एकच खळबळ उडाली आहे. या पदार्थासाठी मोठी साखळी असण्याची शक्यता पोलिसांकडून वर्तवण्यात आली आहे. एवढ्या मोठ्या प्रमाणावर अंमली पदार्थ सापडल्याने पोलीस प्रशासनाच्या कार्यक्षमतेवर प्रश्नचिन्ह उपस्थित होत आहे.