म. टा. वृत्तसेवा, अमरावती: लग्न झाल्याचे प्रमाणपत्र नसल्याने महिला परीक्षार्थ्यांना अंगणवाडी मुख्य पर्यवेक्षकपदासाठी झालेल्या ऑनलाइन परीक्षेस बसू दिले नाही. ही घटना अमरावती शहरात घडली. याच्या निषेधार्थ गुरुवारी महिला परीक्षार्थीनी जिल्हाधिकारी कार्यालय गाठून निवेदन दिले. परीक्षेपूर्वी केंद्रप्रमुख व आयबीपीएसच्या कर्मचाऱ्यांनी त्यांच्याकडे आधारकार्ड, पॅनकार्ड, ट्रान्स्फर सर्टिफिकेट यासारखी शासनमान्य ओळखपत्रे तपासली; परंतु संबंधित परीक्षार्थींकडे विवाह नोंदणी प्रमाणपत्र का नाही, असा प्रश्न उपस्थित करण्यात आला. हे प्रमाणपत्र नसल्याने त्यांना ऑनलाइन परीक्षेस बसू देण्यात आले नाही. त्यामुळे या सर्व परीक्षार्थींनी पुन्हा संधी देण्याची मागणी केली आहे. दरम्यान, २६ फेब्रुवारी रोजी झालेल्या पुरवठा निरीक्षकाच्या परीक्षेसाठी आयबीपीएसद्वारा परीक्षा नियोजित करण्यात आली होती. त्यावेळी परीक्षार्थींना विवाह नोंदणी प्रमाणपत्राची मागणी करण्यात आली नाही. ही अट शिथिल करण्यात आली होती, असा दावाही परीक्षार्थींनी केला आहे.

पेपरफुटीप्रकरणी सात अटकेत

अमरावती-नागपूर महामार्गावरील ड्रीमलँडमधील केंद्रावर घेण्यात आलेल्या मृद व जलसंधारण विभागाच्या पेपरफुटीच्या प्रकरणात पोलिसांनी केंद्र व्यवस्थापकासह सात जणांना अटक केली आहे. बुधवारी रात्री नांदगाव पेठ पोलिसांनी ही कारवाई केली. त्यामुळे या प्रकरणातील आरोपींची संख्या आता दहावर पोहोचली आहे.

परीक्षा केंद्राचे संचालक मयूर रवींद्र बडगुजर याच्यासह स्वप्नील राहुल साळुंखे (३२), प्रतीक जुगलकिशोर राठी (३०), संगमेश्वर नामदेव सरकाळे (२५), उद्देश विनोद काळबांडे (२५), रोहन जयप्रकाश अडसड (३६) व शंतनू सुनील बर्वे (२०) सर्व राहणार अमरावती अशी अटक करण्यात आलेल्यांची नावे आहेत. यापूर्वी परीक्षार्थी यश कावरे याच्यासह दोन दलालांना अटक करण्यात आली होती. राज्याच्या मृद व जलसंधारण विभागाद्वारे द्वितीय श्रेणीतील अधिकारीपदासाठी परीक्षा घेण्यात आली. अमरावतीसाठी ड्रीमलँडमधील एआरएन असोसिएट केंद्रावर ही परीक्षा झाली. या परीक्षेदरम्यान कॉपी केल्याचे पुढे आले. विद्यार्थ्याच्या हॉल तिकिटामागे उत्तरे लिहिण्यात आली होती. विद्यार्थ्यांनी संताप व्यक्त केल्यानंतर परीक्षा केंद्राचे संचालक मयूर रवींद्र बडगुजर (३३), रा. झेंडा चौक, राजापेठ अमरावती) यांनी तक्रार दिली. या तक्रारीवरून पोलिसांनी गुन्हा दाखल केला. यानंतर कॉपी करणारा विद्यार्थी यश अनंत कावरे (२३) याला ताब्यात घेतले.