मुंबई : अमानुष बलात्कार झालेल्या पाच वर्षांच्या मुलीला जे. जे. रुग्णालयातील डॉक्टरांनी तब्बल चार महिने अथक परिश्रम करून मृत्यूच्या दाढेतून कसे खेचून आणले हे पाहिल्यानंतर डॉक्टरांना देव का मानले जाते याची प्रचिती येते. अमानुष बलात्कार झालेल्या अग्नी (नाव बदलले आहे) हिची जगण्याची आशा अनेक डॉक्टरांनी सोडून दिली होती, पण जे. जे. रुग्णालयातील डॉक्टरांनी हार मानली नाही. त्यांच्या विश्वासामुळे, जिद्दीमुळे आणि अथक वैद्यकीय प्रयत्नांमुळे ही पीडिता आज शारीरिक, मानसिकदृष्ट्या सावरली आहे… पूर्ववत होत आहे.तो दिवाळीचा पहिला दिवस होता. सगळी मुंबई दिव्यांच्या प्रकाशज्योतीने उजळून निघाली होती, पण तळोजामधल्या एका छोट्या घरात पाच वर्षांची अग्नी असह्य वेदनांनी किंचाळत होती. मदतीसाठी हाका मारत होती. बाहेर फटाक्यांच्या आवाजामध्ये तिच्या हाका दबून गेल्या. तिच्याच ओळखीतला नराधम तिच्यावर अमानुष बलात्कार करून निघून गेला. अग्नीवर पोटातली आतडी फाटेपर्यंत अत्याचार करण्यात आला. रक्ताच्या थारोळ्यात पडलेल्या आपल्या लेकीला घेऊन तिच्या पालकांनी जवळच्या खासगी, सार्वजनिक रुग्णालयांमध्ये धाव घेतली. मात्र, तडफडणाऱ्या अग्नीचा जीव वाचेल अशी शाश्वती कोणालाही वाटत नव्हती. अखेर या असहाय पालकांनी तिन्हीसांजेच्या वेळी मुंबईतल्या जे. जे. रुग्णालयाकडे धाव घेतली. क्षणाचाही विचार न करता रुग्णालयातला प्रत्येक डॉक्टर अग्नीच्या मागे उभा राहिला. आज या घटनेला चार महिने पूर्ण झाले. मृत्युशय्येवर असलेली ही मुलगी आज बरी झाली आहे. डॉक्टर देवासारखे असतात असे म्हणतात, पण आमच्यासाठी हे देवच आहेत, हे सांगताना तिच्या पालकांच्या डोळ्यातील पाणी थांबत नाही. जे. जे. रुग्णालयातील डॉक्टरांनी केलेल्या अथक प्रयत्नांनंतर अग्नी आता पूर्णपणे बरी झाली असून हसू, खेळू, बागडू लागली आहे.

संदेशखाली प्रकरण: टीएमसी नेता शहाजहा शेख याला अखेर अटक, स्थानिकांचा मिठाई वाटून जल्लोष

अग्नीला घेऊन तिचे पालक जे. जे. रुग्णालयामध्ये आल्यानंतर क्षणाचाही विचार न करता बालरोगशल्य चिकित्सा विभागाचे प्रमुख डॉ. ए. सुयोधन रेड्डी यांनी वैद्यकीय तपासणीनंतर तिच्यावर शस्त्रक्रिया करण्याचा निर्णय घेतला. ही शस्त्रक्रिया अत्यंत जोखमीची होती. जखम इतकी खोल होती की योनीमार्ग आणि गुदद्वारमार्ग एक झाले होते. त्या भागाची शस्त्रक्रिया करून सुव्यवस्थित करण्यात आले. त्यानंतर ‘डायव्हरेजन कोलेस्टॉमी’ या प्रक्रियेद्वारे रक्तस्राव थांबवण्यासह कोणत्याही प्रकारचा संसर्ग फैलावू नये यासाठी शौचाची जागाही बाहेरच्या बाजूला वळवण्यात आली.

या दोन्ही शस्त्रक्रियांनंतर अग्नी व तिच्या कुटुंबीयांना मानसिक आधार देण्यासाठी समुपदेशनही करण्यात आले. वयाने लहान असली तरीही या प्रसंगामुळे ती हादरून गेली होती. बालवय लक्षात घेऊन डॉक्टरांच्या पूर्ण पथकाने अग्नीसह या संपूर्ण कुटुंबाला पहाडासारखा आधार दिला. अग्नीच्या आईला ते संघर्षाचे दिवस आठवतात. तिचा स्वर कातर होतो. इथल्या प्रत्येक डॉक्टरांनी माझ्या मुलीसाठी जे केले आहे, त्याचे ऋण कधीही फेडू शकत नाही, ही कृतज्ञता तिच्या बोलण्यातून व्यक्त होते.

प्रतिनियुक्तीचे प्रयत्न आणि दुसरी शस्त्रक्रिया

या अमानुष अत्याचारामुळे ही मुलगी इतकी व्यथित झाली होती की, ती कुणालाही जवळ येऊ देत नव्हती. रात्री दचकून जागी व्हायची. दिवसभर वेदनांनी तळमळत राहायची. पहिली शस्त्रक्रिया झाल्यानंतर डॉ. सुयोधन यांची पुणे येथे बदली झाली. अग्नीवर पुन्हा दुसरी शस्त्रक्रिया करणेही तितकेच गरजेचे होते. ही दुसरी शस्त्रक्रिया सुरळीत व्हावी यासाठी रुग्णालयाच्या अधिष्ठाता डॉ. पल्लवी सापळे व रुग्णालय प्रशासनाने प्रयत्नपूर्वक डॉ. सुयोधन यांना प्रतिनियुक्तीवर पुन्हा मुंबई येथे बोलावून घेतले.

शिक्षणाचा खर्च उचलणार

हातावर पोट असलेल्या या मुलीच्या शिक्षणाचा खर्च रुग्णालयामार्फत दात्यांच्या मदतीने सामाजिक सेवा विभागाच्या माध्यमातून करण्यात येणार आहे. रुग्णालयाच्या अधिष्ठाता डॉ. पल्लवी सापळे यांच्या मार्गदर्शनाखाली डॉ. ए. सुयोधन रेड्डी, डॉ. विलास एन. कुरुडे, डॉ. कुंदन गोसावी, डॉ. छाया वळवी, डॉ. उषा बडोले यांनी वैद्यकीय उपचार केले.