नागपूर: पैशाच्या वादातून पत्नीची हत्या केल्यानंतर पतीने गळा चिरुन आत्महत्येचा प्रयत्न केला. ही थरारक घटना एमआयडीसी -बुटीबोरी पोलिस ठाण्याच्या हद्दीतील बीड गणेशपूर येथे उघडकीस आली. जखमी पतीवर बुटीबोरीतील हॉस्पिटलमध्ये उपचार सुरू असून त्याची प्रकृती चिंताजनक आहे. सुनीता (वय ४५), असे मृतकाचे तर रणजित नत्थू चौधरी (वय ४८),असे जखमीचे नाव आहे.पोलिसांनी दिलेल्या माहितीनुसार, सुनीता यांना पहिल्या पतीपासून तीन मुले असून एक २२ वर्षांचा तर अन्य दोघे २० व २१ वर्षांचे आहेत. ते खासगी काम करतात. गेल्या आठ वर्षांपासून सुनीता व रणजित लिव्ह इनमध्ये राहायचे राहायचे. रणजितचे पुण्यातील काम सुटल्याने एक महिन्यापूर्वी तो बीड गणेशपूर येथे परतला. रविवारी रात्री १० वाजताच्या सुमारास पैशावरून रणजित व सुनीतामध्ये वाद झाला. त्यानंतर मध्यरात्री १.३० वाजताच्या सुमारासही दोघांमध्ये वाद झाला.

जमीन खरेदी-विक्रीचा एकत्र व्यवसाय, पैशांवरुन भागीदारांचा त्रास, कंटाळलेल्या तरुणाचा टोकाचा निर्णय
वाद विकोपाला गेल्याने रणजितने गळा आवळून सुनीताचा खून केला. त्यानंतर सकाळी ८.३० वाजताच्या सुमारास त्याने चाकूने गळा चिरला. याचदरम्यान शेजारी राहणाऱ्या महिलेने सुनीता यांना आवाज दिला. ती झोपली असल्याचे रणजितने सांगून दरवाजा बंद केला. अर्ध्या तासानंतरही दरवाजा बंद असल्याने महिलेला संशय आला. तिने अन्य शेजाऱ्यांच्या मदतीने दरवाजा ढकलला असता रणजित हा बेशुद्ध तर सुनीता या मृतावस्थेत आढळल्या. शेजाऱ्याने बाजूच्या खोलीत राहणाऱ्या मुलांना याबाबत माहिती देत एमआयडीसी बुटीबोरी पोलिसांना कळविले. माहिती मिळताच ठाणेदार राजीव कर्मलवार यांच्यासह पोलिसांचा ताफा तेथे पोहोचला. पंचनामा करून सुनीता यांचा मृतदेह हॉस्पिटलकडे रवाना केला. जखमी रणजितला हॉस्पिटलमध्ये दाखल केले. याप्रकरणी पोलिसांनी खुनाच्या गुन्ह्यासह विविध कलमान्वये गुन्हा दाखल करून तपास सुरू केला आहे.