पुणे : माढा लोकसभा मतदारसंघात भाजपाने मोठा गाजावाजा करत मोहिते पाटील यांच्या घराण्यातील नेत्यांना पक्षात घेतलं. परंतु उमेदवारीवरुन भाजपपुढे मोठा पेचप्रसंग निर्माण झाला आहे. कारण विद्यमान खासदार रणजितसिंह नाईक निंबाळकर आणि रणजितसिंह मोहिते पाटील असा अंतर्गत कलह माढा लोकसभा मतदारसंघात सुरु आहे. यातच आता सांगोला मतदारसंघातील शिवसेना आमदार शहाजी बापू पाटील यांनी आपला पाठिंबा विद्यमान खासदार रणजितसिंह नाईक निंबाळकर यांना दर्शवला आहे. त्यामुळे भाजपने केलेली इन्कमिंग त्यांच्यासाठीच अडचणीची ठरु शकते का? असा प्रश्न उभा राहिला आहे.
मोहिते पाटील घराणे गेल्या अनेक वर्षांपासून सोलापूर जिल्ह्यामध्ये वर्चस्व निर्माण करून राहिले होते. मात्र मधल्या काळात मोहिते पाटील घराण्याची अवस्था बिकट झाली. त्यांनी भाजपामध्ये प्रवेश केला. माढा लोकसभेचे नेतृत्व यापूर्वी शरद पवार यांनी सुद्धा केलेले आहे. त्यामुळे बदललेल्या राजकीय परिस्थितीत भाजपसाठी हा मतदारसंघ तितकाही सोपा राहिला नव्हता. त्यातच शहाजी बापूंच्या वक्तव्याने भाजपची आणखी अडचण होण्याची शक्यता आहे.
भाजपचे इच्छुक उमेदवार रणजितसिंह मोहिते पाटील की भाजपचे विद्यमान खासदार रणजितसिंह नाईक निंबाळकर या दोघांमध्ये कोणाला निवडणूक लढवण्याची संधी मिळणार, याकडे सर्वांचे लक्ष आहे. परंतु शिवसेनेचे सांगोल्याचे विद्यमान आमदार शहाजीबापू पाटील यांनी आपला पाठिंबा खासदार रणजितसिंह निंबाळकर यांना दिला आहे. त्यामुळे रणजितसिंह पाटील यांना लोकसभेचं तिकीट मिळवण्यासाठी अजून जोर लावावा लागणार, असं चित्र दिसत आहे.
ठाकरेंपासून मनाने दुरावलो, मैत्री उरलेय का त्यांनाच विचारा; देवेंद्र फडणवीसांच्या भावना
आमदार शहाजी बापू पाटील आज उपमुख्यमंत्री अजित पवार यांची भेट घेण्यासाठी पुण्यातल्या सर्किट हाऊस या ठिकाणी आले होते. पाटील यांनी त्यानंतर पत्रकारांसोबत संवाद साधला. दरम्यान माढा लोकसभेसाठी शिवसेना इच्छुक आहे का? असा प्रश्न केला असताना, शहाजीबापूंनी आपली प्रतिक्रिया दिली.
Read Latest Maharashtra News Updates And Marathi News
शहाजीबापू पाटील म्हणाले, ती जागा भाजपाची आहे. म्हणून आम्ही त्या जागेची मागणी केली नाही आणि करणारही नाही. मी शिवसेनेचा एकमेव आमदार आहे. माझा पाठिंबा विद्यमान खासदार रणजितसिंह नाईक निंबाळकर यांना होता, आहे आणि पुढेही राहील. पक्षाने विचार केला आणि रणजितसिंह मोहिते पाटील यांना उमेदवारी दिली तर मी त्यांचं काम करेन, पण माझा पाठिंबा नेहमी निंबाळकर यांनाच राहील. कारण गेल्या ५ वर्षांमध्ये रणजितसिंह निंबाळकर यांनी पंढरपूर आणि सांगोला या मतदारसंघात खूप चांगलं काम केलं आहे. प्रामुख्याने शिवसेनेचे प्रश्न देखील त्यांनी सोडवले आहेत. म्हणून माझा त्यांना पाठिंबा राहील. अशी थेट प्रतिक्रिया शिवसेना आमदार शहाजी बापू पाटील यांनी दिली आहे.