अहमदनगर : राष्ट्रवादी काँग्रेस शरदचंद्र पवार पक्षाला तुतारी हे निवडणूक चिन्ह मिळाले आहे. त्यावर सध्या विविध प्रतिक्रिया येत असून त्या आधारे घोषणा आणि टीकाही सुरू झाली आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी या चिन्हाचे स्वागत करताना आम्ही हातात मशाल व तुतारी घेऊन निवडणुका लढविणार असे महाविकास आघाडीच्या चिन्हांचे एकत्रित वर्णन केले आहे. यावरून भाजपचे खासदार डॉ. सुजय विखे पाटील यांनी त्यांना टोला लगावला आहे.

पक्षाला तुतारी हे चिन्ह मिळाल्यानंतर रोहित पवार यांनी चारोळीतून प्रतिक्रिया व्यक्त केली आहे. त्यांनी म्हटले आहे, होऊ एक घेऊ हातात हात खुशाल. पेटवू महाराष्ट्राच्या स्वाभिमानाची मशाल. न डगमगता वाजवू क्रांतीची मशाल. गाडून टाकू महाराष्ट्रातून समूळ गद्दारी. यावर प्रसारमाध्यमांनी विचारले असता खासदार विखे पाटील म्हणाले, ‘मशाली घ्या, तुतारी घ्या, तुमचे स्वागत आहे. मात्र, तुतारी वाजेल की, नुसती हवा निघेल, हेही लवकरच कळेल. फार तर फार आम्ही तुम्हाला नवीन तुतारी घेऊन देऊ,’ अशी मिश्किल टिप्पणी विखे पाटील यांनी केली.

अहमदनगरसाठी २० कोटींचा निधी

नगर विकास विभागामार्फत अहमदनगर शहरासाठी मुख्यमंत्री एकनाथ शिंदे, उपमुख्यमंत्री देवेंद्र फडवणीस, उपमुख्यमंत्री अजित पवार व पालकमंत्री राधाकृष्ण विखे पाटील यांच्या माध्यमातून २० कोटी रुपयांचा निधी मंजूर झाल्या असल्याची माहिती डॉ. सुजय विखे पाटील यांनी यावेळी दिली. त्यांनी सांगितले की, सरकारकडून नागरी मुलभूत सेवा सुविधांसाठी २० कोटी रुपयांचा निधी मंजूर झाला आहे. लवकरच महापालिकेला वर्ग केला जाणार आहे.

पालकमंत्री राधाकृष्ण विखे पाटील यांच्या माध्यमातून नगर विकास विभागाच्या खात्यातून “महानगरपालिका क्षेत्रात मूलभूत सोई सुविधांच्या विकासासाठी विशेष तरतूद” या योजनेअंतर्गत हा निधी मिळाला आहे. शहरातील मुलभूत सोई सुविधा उभारण्यासाठी येणारी निधीची समस्या मार्गी लागली असून लवकरच शहरात विविध नागरी कामांना सुरवात केली जाईल. या निधीतून शहरातील रस्ते, जलवाहिन्या, गटारे, सभामंडप आणि इतर विविध नागरी कामे मार्गी लागणार आहेत. यामुळे नागरिकांना भेडसावणाऱ्या विविध समस्या कमी होऊन शहराचा विकास साधला जाईल असा आत्मविश्वास खासदार डॉ. विखे पाटील यांनी व्यक्त केला आहे.