म. टा. प्रतिनिधी, मुंबई :‘महाराष्ट्र टाइम्स’तर्फे ‘मायमराठी… उत्सव मराठीचा’, हा चित्रकला, भाषा, इतिहास, परंपरा यांचा अनोखा सोहळा फोर्ट येथील द टाइम्स ऑफ इंडियाच्या इमारतीखाली आयोजित करण्यात आला आहे. मायमराठी उत्सवास बीसीसीएलचे व्हीसीएमडी समीर जैन यांनी स्वतः भेट दिली. या प्रदर्शनात आणि कलादालनात मांडण्यात आलेल्या शिल्पांचे, शिल्पकारांचे, चित्रांचे व चित्रकारांचे त्यांनी कौतुक केले.कलाकारांशी संवाद साधून या उपक्रमास शुभेच्छा दिल्या.यावेळी चित्रपटसृष्टीतील ज्येष्ठ दिग्दर्शक महेश मांजरेकर, अभिनेता श्रेयस तळपदे आणि सुनील बर्वे आणि अभिनेत्री गौरी इंगवले हे सुप्रसिद्ध कलाकारही उपस्थित होते. ‘मायमराठी’ उत्सवाचा आनंद द्विगुणित होण्यासाठी आवर्जून उपस्थित राहिलेले कलाकार व मान्यवरांशी जैन यांनी प्रारंभी अनौपचारिक संवाद साधला. ढोलताशांच्या गजरात आणि लेझीम पथकाच्या साथीने सर्व मान्यवरांचे आगमन झाले. यावेळी विविध चित्रकृती आणि शिल्पकृती पाहून सर्वजण मंत्रमुग्ध झाले.
मनोज जरांगे आणि बारसकर महाराज यांच्यात आरोपांच्या फैरी, मराठा आंदोलनात फूट? उदय सामंत म्हणाले…
उत्सवात कला विद्यार्थ्यांनी घडविलेल्या छत्रपती शिवाजी महाराजांच्या भव्य शिल्पाच्या कलेस सर्वांनी दाद दिली. मराठी भाषा व महाराष्ट्राचा वारसा सांगणाऱ्या व त्यावर मटाचे योगदान अधोरेखित करणारी भित्तीचित्रेही सर्वांच्या आकर्षणाची केंद्र ठरली आहेत. छत्रपती शिवरायांच्या अर्धाकृती पुतळ्याला पुष्पहार घालून व्हीसीएमडी जैन यांनी या उत्सवाला शुभेच्छा दिल्या.

यावेळी ‘बीसीसीएल कॉर्पारेट’चे सीईओ शिवकुमार सुंदरम, ‘बीसीसीएल लँग्वेजेस’चे ‘ब्रँड हेड’ शुभायू बागची, ‘महाराष्ट्र टाइम्स’चे संपादक पराग करंदीकर हेही उपस्थित होते. ‘जगातील सर्वात मोठा वृत्तपत्रसमूह असलेल्या टाइम्स ऑफ इंडियाने भारतीय भाषा, भषिक परंपरा आणि मूल्ये यांचा सदैव आदर केला आहे. म्हणूनच महान मराठी भाषेचा, संस्कृतीचा गौरव करणाऱ्या महोत्सवासाठी आम्ही या सप्ताहाची निवड केली. श्रेष्ठ मराठी पत्रकारितेची परंपरा पुढे घेऊन जाण्यात, मराठी पत्रकारितेची, विश्वसनीयतेची सर्वोच्च मूल्ये स्थापित करण्यात आणि मराठी संस्कृतीचे संवर्धन करण्यात महाराष्ट्र टाइम्सने जी महत्त्वाची भूमिका बजावलेली आहे, तिचा इथे मला अत्यंत अभिमानाने उल्लेख करावासा वाटतो’, अशा भावना व्यक्त करत शिवकुमार सुंदरम यांनी या उत्सवाला शुभेच्छा दिल्या.